Van de Beek រកបានភ្នាក់ងារថ្មីក្នុងក្ដីសង្ឃឹមរកក្លិបថ្មីបានឆាប់ៗ
មិត្តរួមក្រុមនៅ Manchester United បានផ្ដល់ដំបូន្មានឲ្យ Donny van de Beek ផ្លាស់ប្ដូរភ្នាក់ងារ ក្រែងអាចស្វែងរកទ្រនំថ្មីឆាប់ៗ។ នេះបើតាមការផ្សាយពីសារព័ត៌មាន Daily Mail។
ប្រភពដដែលបញ្ជាក់ថា អតីតកីឡាករ Ajax Amsterdam បានប្រាប់អ្នកតំណាងរបស់ខ្លួន គឺលោក Guido Albers ពីការចែកផ្លូវគ្នា កាលសប្ដាហ៍មុន។
Van de Beek បានប្រាប់លោក Albers ឲ្យជួយគេចរចាស្វែងរកក្លិបដើម្បីបានចាកចេញពីទឹកដី Old Trafford។
បច្ចុប្បន្នកីឡាករវ័យ២៤ឆ្នាំបាននិងកំពុងសហការជាមួយភ្នាក់ងារម្នាក់ទៀត ឈ្មោះថា Ali Dursun ដែលធ្វើជាមួយមិត្តរួមក្លិប Victor Lindelof និង Frankie de Jong របស់ Barcelona។
Van de Beek បានផ្លាស់ពី Ajax ទៅ Manchester United ក្នុងខែសីហា ឆ្នាំ២០២០ ហើយគិតមកទល់ពេលនេះគេលេងជម្រើស១១នាក់ដំបូងទើបបាន២០ដងប៉ុណ្ណោះនៅ Premier League ដោយ១៩ប្រកួតនៅរដូវកាលមុន និង១ប្រកួតនៅរដូវកាលនេះ៕
