កីឡាករ Barcelona បានប្រមូលផ្ដុំគ្នានៅគេហដ្ឋានរបស់ Lionel messi នាថ្ងៃចន្ទ ទី០៣ ខែឧសភា ដោយមានការអាំងសាច់ និងហូបចុកយ៉ាងរីករាយ មុនការប្រកួត La Liga តទឡ់​ Atletico Madrid ចូល​មកដល់នៅថ្ងៃសៅរ៍ ទី០៨ ខែឧសភា ខាងមុខ។

ក្រោយទទួលបានជ័យជម្នះ២ទល់នឹង៣លើ Valencia នាកីឡដ្ឋាន Mestalla នាល្ងាចថ្ងៃអាទិត្យ ទី០២ ខែឧសភា ក្រុមលោក Ronald Koeman បានដាក់គោលដៅឈ្នះទាំង៤ប្រកួតនៅសល់។

ប្រសិនបើអាចឈ្នះ Atletico Madrid នោះ ពួកគេអាចនៅសល់ក្ដីសង្ឃឹមច្រើនក្នុងការប្រជែងជើងឯក La Liga។

សារព័ត៌មានអេស្ប៉ាញ Marca រាយការណ៍ថា កីឡាករដែលបានចូលរួមអាហារពេលល្ងាចនេះបាននាំទាំងគូស្នេហ៍ចូលរួមថែមទៀត។

ក្រោយចាប់ផ្ដើមរដូវកាលមិនបានល្អ ទំនាក់ទំនងក្នុងចំណោមកីឡាករបានប្រសើរឡើងវិញហើយប៉ុន្មានខែចុងក្រោយ។

ជាធម្មតា ពួកគេជួបគ្នានៅភោជនីយដ្ឋាន តែលើកនេះសម្រេចធ្វើម្ហូបនៅផ្ទះប្រធានក្រុមវិញ។

ក្រុមលោក Ronald Koeman បានហ្វឹកហាត់សម្រួលខ្លួននាពេលព្រឹក ក្រោយការប្រកួតតទល់ Valencia។ យោងតាមវិធានការថ្មីស្ដីពីការទប់ស្កាត់កូវីដ១៩នៅអេស្ប៉ាញ ក្នុងមួយតុអាហារ អាចអង្គុយបាន៦នាក់ ដាច់គ្នានៅកន្លែងវាល៕