Kylian Mbappe ប្រហែលជាមិនបានហ៊ែតទ្រីកតទល់ Barcelona ទេ ប្រសិនបើក្រុមនៅ Camp Nou ជ្រើសរើសខ្សែប្រយុទ្ធវ័យក្មេងរូបកាលឆ្នាំ២០១៧។

អ្នកតំណាង​ Mbappe លោក Josep Minguella បង្ហើបថា ក្រុមរហស្សនាមអ្នកមានបុណ្យបានចរចាក្នុងបំណងផ្ទេរយកអតីតកីឡាករ AS Monaco ខាងលើកាលឆ្នាំ២០១៧ ជំនួស Neymar ដែលពេលនោះបានចាកចេញទៅ Paris Saint Germain។ Barca បានស្នើក្នុងតម្លៃ១៣០លានអឺរ៉ូ និងបន្ថែម២៥លានអឺរ៉ូទៀត អាស្រ័យលើគុណផលរបស់ Mbappe។ គេក៏ត្រូវបានផ្ដល់ថ្លៃនឿយហត់ចន្លោះ១០ទៅ១៦លានអឺរ៉ូក្នុងមួយរដូវកាល ក្រោយកាត់ពន្ធរួច។

ទីបំផុត ថ្នាក់ដឹកនាំ Barcelona បានសម្រេចចិត្តជ្រើសរើស Ousmane Dembele វិញ ព្រោះពួកគេលើកឡើងថា Mbappe ពុំមានស្នាដៃអ្វីឡើយ។

ក្រោយមិនបានទៅ Barcelona នាឆ្នាំ២០១៧នោះ Mbappe បានចូលរួមជាមួយ PSG ពី AS Monaco លើលក្ខខណ្ឌខ្ចីក្នុងរដូវកាលដំបូង មុនផ្ទេរផ្ដាច់១៨០លានអឺរ៉ូ។

ជិត៤ឆ្នាំក្រោយមក Mbappe រកបាន១១១គ្រាប់ក្នុងចំណោម១៥៣ប្រកួតនៅ PSG ហើយបានឈ្នះជើងឯកក្របខណ្ឌកំពូលបារាំងរាល់រដូវកាល និងក្លាយជាកីឡាករដ៏ថ្លៃមួយរូប។ ក្នុងក្រុមជម្រើសជាតិវិញ Mbappe រួមចំណែកឈ្នះជើងឯក World Cup 2018 និងរកបាន៤គ្រាប់ក្នុងព្រឹត្តិការណ៍ពិភពលោកនេះ។

សម្រាប់ Dembele វិញ Barcelona ទិញពី Dortmund ១០៥លានផោនបូករួមទាំងប្រាក់បន្ថែម៤០លានអឺរ៉ូអាស្រ័យលើការលេង។ ផ្ទុយទៅវិញ គេមិនសូវបានរួមចំណែកគួរកត់សម្គាល់ខ្លាំងឡើយ ដោយសាររបួស។ ក្នុងរយៈពេល៤ឆ្នាំ គេរកបានតែ២៥គ្រាប់ពីការប្រកួត១០១លើកគ្រប់កម្មវិធី។ តម្លៃខ្លួនរបស់ Dembele ធ្លាក់ចុះមកនៅ៤៥លានផោននាពេលបច្ចុប្បន្ន។

ដោយឡែក ក្នុងវគ្គ១៦ក្រុម ជើងទីមួយ UEFA Champions League ថ្មីៗនេះ Mbappe រកបាន៣គ្រាប់ម្នាក់ឯងក្នុងជ័យជម្នះ១ទល់នឹង៤របស់ PSG លើ FC Barcelona៕