ការតែតបញ្ចូលទីពី Roberto Firmino នៅនាទី៩០បានផ្ដល់៣ពិន្ទុពេញដល់ Liverpool តាមរយៈជ័យជម្នះ២ទល់នឹង១លើ Tottenham Hotspur ក្នុងការប្រកួត Premier League នៅថ្ងៃពុធ ទី១៦ ខែធ្នូ។

ក្រុមហង្សក្រហមបាននាំមុខមួយគ្រាប់មុននៅនាទី២៦ពេល Mohamed Salah ទាត់ទៅប៉ះជើង Eric Dier ធ្វើឲ្យអ្នកចាំទី Hugo Lloris អស់ជំហរសង្គ្រោះ។ ៧នាទីក្រោយមក
Heung-Min Son ទាត់បញ្ចូលទីតាមស្មើវិញ ក្រោយទទួល​បាល់ពីការបញ្ជូនដោយ Giovani Lo Celso។

ចូលដល់វគ្គទីពីរ Spurs បានដាក់សម្ពាធគួរសមដែរ តែមិនអាចសម្រេចទីបាន។ ដល់នាទី៩០ ការទាត់បាល់ជ្រុងរបស់ Andy Robertson បានរត់ទៅចំក្បាលFirmino ហើយក៏តែតបញ្ចូលទីបានសម្រេច។

ដូច្នេះ Liverpool យកបានកៅអីកំពូលតារាង ដោយមាន២៨ពិន្ទុពីលើ Spurs ដែលមាន២៥ពិន្ទុដដែលឈរនៅលេខពីរ៕