Leicester City បានប្រកាសពីការចាកចេញរបស់កីឡាករ៨រូបទាំងមកពីក្រុមធំ និងថ្នាលយុវជន រួមមានក្មួយព្រះមហាក្សត្រស៊ុលតង់នៃប្រទេសប្រ៊ុយណេ គឺ Faiq Bolkiah ក្រោយកិច្ចសន្យារបស់ពួកគេអស់សុពលភាពនៅសប្ដាហ៍នេះ។

មានកំណើតនៅសហរដ្ឋអាមេរិក ឆ្នាំ១៩៩៨ Faiq ផ្ដើមហ្វឹកហាត់បាល់ទាត់នៅឆ្នាំ២០០៩ ពេលចូលរួមជាមួយមជ្ឈមណ្ឌលបណ្ដុះបណ្ដាល AFC Newbury ប្រទេសអង់គ្លេស។

គេបានឆ្លងកាត់ថ្នាលយុវជន Southampton, Arsenal និង Chelsea មុនចូលរួមជាមួយ Leicester City នៅឆ្នាំ២០១៦។ រយៈពេល៤ឆ្នាំមកនេះ សមាជិករាជវង្សខាងលើពុំទាន់បានបង្ហាញខ្លួននៅក្រុមធំទេ។

សារព័ត៌មាន Marca ធ្លាប់ប្រកាសថា Faiq ជាកីឡាករបាល់ទាត់មានទ្រព្យសម្បត្តិច្រើនជាងគេលើលោកដល់ទៅ២០ពាន់លានដុល្លារអាមេរិកលើស Lionel Messi និង Cristiano Ronaldo ខ្ទង់៥០ដង។

គេធ្លាប់មកប្រកួតនៅកម្ពុជាជាមួយប្រ៊ុយណេវគ្គជម្រុះ AFF Championship 2016 ទៀតផង៕

ប្រភព ៖ zingnews.vn