ប្រជៀវខ្មៅ Valencia បានប្រកាសសមាសភាពគ្រូបង្វឹកថ្មី ត្រៀមដឹកនាំក្នុងព្រឹត្តិការណ៏ Champions League
ប្រជៀវខ្មៅ Valencia បានប្រកាសសមាសភាពគ្រូបង្វឹកថ្មីជំនួសលោក Marcelino ដែលត្រូវបណ្តេញចេញកាលពីថ្ងៃពុធ បន្ទាប់ពីដឹកនាំ៣ប្រកួតក្នុងរដូវកាលថ្មី La Liga ឈ្នះតែមួយប្រកួតប៉ុណ្ណោះ។
លោក Albert Celades ត្រូវបានក្រុមប្រជៀវខ្មៅតែងតាំងជាគ្រូបង្វឹកថ្មីសំរាប់ដឹកនាំបន្ត។ កិច្ចការដំបូងរបស់លោក Celades គឺត្រូវដឹកនាំ Valencia ប្រកួតជាមួយអ្នកមានបុណ្យ Barcelona នៅថ្ងៃសៅរ៍សប្តាហ៍នេះ។
អតីតគ្រូបង្វឹកជំរើសជាតិអេស្ប៉ាញអាយុក្រោម ២១ឆ្នាំ បានចុះកិច្ចសន្យារយៈពេល២ឆ្នាំជាមួយ Valencia ដោយត្រូវរ៉ាប់រងដឹកនាំប្រជៀវខ្មៅប្រជែងក្នុងព្រឹត្តិការណ៏ UEFA Champions League នៅរដូវកាលថ្មីនេះ ដែលជាស្នាដៃដឹកនាំរបស់លោក Marcelino។ ប្រកួតដំបូងត្រូវប៉ះជើងឯក Europa League តោខៀវ Chelsea ដែលស្ថិតក្នុងពូល H។
អតីតកាលរបស់លោក Albert Celades ធ្លាប់ជាកីឡាកររបស់ FC Barcelona អំឡុងឆ្នាំ ១៩៩៥-១៩៩៩ និង Real Madrid អំឡុងឆ្នាំ ២០០០-២០០៥ ហើយធ្លាប់លើកពាន La Liga ៤លើកជាមួយក្លឹបយក្សទាំងពីរនេះ៕
