បើ​តាម​ការ​បង្ហើប​អោយ​ដឹង​រឿង​ដែល​គួរ​អោយ​ភ្ញាក់​ផ្អើល​មួយ​តាម​រយៈ​លោក​ Giovannni Mauri ដែល​ជា​អតីត​គ្រូ​បង្វឹករបស់ Ronaldo ផ្នែក​លំហាត់​ប្រាណ​បាន​បង្ហើប​អោយ​ដឹង​ថា កីឡាករ​សញ្ជាតិ​ព័រ​ទុយ​ហ្កាល់​រូប​នេះ​មិន​ដែល​ខកខាន​ក្នុង​ការ​ហាត់​ប្រាណ​ទេ។ Ronaldo បាន​ក្រោក​ហាត់​ប្រាណ​តាំង​ពី​ម៉ោង​២​ទៀប​ភ្ហឺ​ប្រសិន​បើ​គេ​ត្រូវ​ចេញ​ដំណើរ​ទៅ​ប្រកួត​ជា​ Champions League នៅ​វេលា​ម៉ោង​៦​ឬ​៧​ព្រឹក។

Ronaldo តែង​តែ​ធ្វើ​បែប​នេះ​នា​អំឡុង​ពេល​ដែល​រូប​គេ​បាន​ឋិត​នៅ​ជាមួយ​ក្លិប​ចាស់​អធិរាជស Real Madrid។ ការ​ដែល​ធ្វើ​អោយ​ខក​ខាន​ការ​ហាត់​ប្រាណ​វា​គឺ​ជា​ទម្លាប់​មិន​ល្អ នេះ​គឺ​ជា​ការលើក​ឡើង​ដោយ​លោក​ Mauri ដែល​បាន​ឮ​ Ronaldo និយាយចេញ​ពី​មាត់។ មាន​ការ​និយាយតៗ​គ្នា​ផង​ដែរ​ពី​ទម្លាប់​ហាត់​ប្រាណ​ដ៏​តឹងរឹង​គ្មាន​អ្នក​ណា​ធ្វើ​ដូច​ជា​កីឡាករ​បាល់​ទាត់​រូប​នេះ​។

គួរ​បញ្ជាក់​ថា Cristiano Ronaldo វ័យ​៣៣​ឆ្នាំ​បាន​លើក​ដៃ​លា​ Real Madrid ដែល​ធ្លាប់​បាន​រួម​រស់​ជាមួយ​អស់រយៈ​ពេល​ជិត​មួយ​ទស្សវត្ស​មកហើយ​នុះ​បាន​​ចូល​រួម​ជា​មួយ​និង​ក្លិប​ថ្មី​សេះ​បង្កង់ Juventus នៅ​អ៊ីតាលី​​នៅ​រដូវ​កាល​ថ្មី​នេះ។ Ronaldo បាន​ធ្វើតេស្ត​សុខភាព​​ជាប់​ជា​ស្ថាពរ​ជាមួយ​និង​លទ្ធផល​ដែល​មិន​គួរ​អោយ​ជឿ​គឺ​ថា កម្លាំង​ឋាម​ពល​របស់​បុរស​កូន​៥(ក្នុងផ្ទៃ១)រូបនេះ​​ស្មើ​និង​ក្មេង​កម្លោះ​វ័យ​២០​ឆ្នាំ​តែ​ប៉ុណ្ណោះ។

ដោយ៖ កំប្រុក​ព្រៃ​