ស្របពេលដែលទីផ្សារដោះដូរកីឡាករ ត្រូវបិទទ្វារ នៅថ្ងៃទី ៩សីហានេះ ក្លឹប​កាំភ្លើងធំ Arsenal បាន​ប្រកាស​បើក​ទ្វារចំហ សម្រាប់ការ​ដេញ​ថ្លៃលក់កីឡាករ ៣នាក់ រួមមាន Danny Welbeck, David Ospina និង Mohamed Elneny។ អ្នក​ចាត់ការទូទៅក្លឹបកាំភ្លើងធំ លោក Unai Emery មានគម្រោង​ចង់​តុបតែងក្រុម​ឡើងវិញ បន្ទាប់ពីទើប​បាន​ចុះ​កុងត្រា​ថ្មី  នាំចូល​កីឡាករចំណូលថ្មី ៥នាក់​បន្ថែមទៀត។

ការពិត​ទៅ ខ្សែប្រយុទ្ធ Danny Welbeck នៅ​សល់​កុងត្រា​មួយឆ្នាំទៀត ប៉ុន្តែ Arsenal ព្រមលក់គាត់ចេញ ជាជាង​ប្រឈមមុខ​នឹងការទុក​ដល់​រដូវក្តៅ​ក្រោយ ហើយ​លក់​ចេញ​អត់​បាន​អ្វីទាំងអស់។ នេះបើតាមការ​លើកឡើង​របស់​អ្នក​វិភាគបាល់ Premier League។

ចំណែក​អ្នក​ចាំទី Ospina ក៏ត្រូវបានគ្រូបង្វឹកថ្មី ទម្លាក់ទៅ​ដល់ជម្រើសទី ៣ បន្ទាប់​ពីការមក​ដល់​នៃកីឡាករ Bernd Leno ពី Bayern Leverkusen ហើយពេលនេះ Arsenal ក៏កំពុង​មានទំនាក់ទំនងជាមួយក្លឹប Besiktas ដើម្បីយក​អ្នក​ចាំទីថ្មី​ណាម្នាក់មួយ​ទៀតផងដែរ។

រីឯ Elneny ដែល​ទើបចុះកុងត្រា​ថ្មី កាលពីខែមីនានោះ ក៏ត្រូវបាន​លោក Emery មើលឃើញថា គាត់​អាច​រក​មនុស្សជំនួសបាន ដូចជា Lucas Torreira និង Matteo Guendouzi ដែល​មាន​ន័យ​ថា Arsenal មាន​កីឡាករនៅ​តំបន់​បម្រើ​ការពារគ្រប់គ្រាន់ហើយ៕