បន្ទាប់ពី​ជួយ​ឲ្យ​បារាំងទទួលបានជ័យ​ជម្នះ និង​ក្លាយជាជើងឯកពានរង្វាន់បាល់ទាត់​ពិភពលោក World Cup 2018 នៅរុស្ស៊ី កីឡាករវ័យ ១៩ឆ្នាំ Kylian Mbappe បាន​បញ្ជាក់​ពី​ពាក្យ​ចចាមអារាម ជុំវិញ​ការ​ផ្លាស់ប្តូរទៅកាន់ក្លឹបយក្សនៅអេស្ប៉ាញ Real Madrid។ ចម្លើយរបស់​ម្ចាស់​ពានរង្វាន់ World Cup’s Young Player of the Tournament នេះ គឺគេនឹងបន្តនៅជាមួយក្លឹប​បារាំង Paris Saint- Germain ក្នុងរដូវក្តៅនេះ។

Mbappe បានប្រាប់អ្នកសារព័ត៌មាន បន្ទាប់ពីព្រឹត្តិការណ៍យប់មិញថា ៖ «ខ្ញុំនឹង​នៅជាមួយ PSG បន្ត​ដំណើររបស់ខ្ញុំជាមួយពួកគេ។ ខ្ញុំ​ទើបតែចាប់ផ្តើម​អាជីពរបស់​ខ្ញុំ។»

គួរជម្រាបជូនថា K. Mbappe បានក្លាយជាកីឡាករវ័យ​ទី២ ដែលបាននាំក្រុម​បាល់ទាត់ជម្រើសជាតិទៅកាន់វគ្គផ្តាច់ព្រ័ត្រ ការប្រកួតបាល់ទាត់ World Cup បន្ទាប់ពីកីឡាករ Pele ដែល​ធ្វើបានកាលពីឆ្នាំ ១៩៥៨។ កាលពីពេលថ្មីៗនេះ មានដំណឹងថា Real Madrid ពិតជាចង់បាន​ Mbappe ខ្លាំងណាស់ ដើម្បីជំនួស​តំណែង Cristiano Ronaldo ដែលបាន​ចាកចេញ ដើម្បីទៅចូលរួមជាមួយ Juventus នៅអ៊ីតាលី ក្នុង​កិច្ចព្រមព្រៀងទឹកប្រាក់ ១០០លានអឺរូ។ កន្លងមក ក៏មានដំណឹងថា Real Madrid ចង់បានកីឡាករប្រេស៊ីល Neymar ផងដែរ ប៉ុន្តែក្រោយ​មក​ទៀត​ ក្លឹបនេះ ក៏បាន​ចេញសេចក្តីថ្លែងការណ៍ចំនួន ២ច្រាន ចោល​រឿងនេះតែម្តង។

នៅពេលនេះ សំណួរសួរថា តើ​អ្នក​ណានឹង​អាចជំនួស Cristiano Ronaldo នៅ Real Madrid បើ K. Mbappe និង Neymar ត្រូវបានបដិសេធថាមិនមែនជាមុខព្រួញទៅហើយ? យ៉ាងណាពេលនេះ នៅមានកីឡាករ ៣នាក់ទៀត ដែលជាគោលដៅ ដោយក្នុងនោះរួមមាន Eden Hazard ដែល​បានបង្ហាញ​ទម្រង់លេងយ៉ាងល្អឲ្យ​ក្រុម​ជម្រើសជាតិបែលហ្ស៊ិក និង​បច្ចុប្បន្នកំពុងលេងនៅក្លឹបតោខៀវ Chelsea ក្នុងប្រទេសអង់គ្លេស។

ចំណែកមួយរូបទៀត គឺ Paulo Dybala កីឡាករអាស្សង់ទីន ដែលកំពុងលេងនៅក្លឹបរបស់អ៊ីតាលី Juventus និង​ជាកីឡាករម្នាក់ ដែល​មាន​សមត្ថភាព​បម្រើ​ប្រយុទ្ធដូចគ្នាទៅនឹង Ronaldo និង Messi (នេះជាមូលហេតុមួយដែលទោះជា Dybala ល្អ ក៏គ្រូបង្វឹកមិនបានដាក់ឲ្យលេងក្នុងជម្រើស ១១នាក់ដំបូងជាមួយ Messi) ។

ហើយមួយរូបទៀត គឺកីឡាករវ័យ ២៩ឆ្នាំ Robert Lewandowski ដែល​ជាកីឡាករ​ជម្រើសជាតិប៉ូឡួញ និង​បច្ចុប្បន្នកំពុងលេងនៅក្លឹបរបស់អាល្លឺម៉ង់ Bayern Munich។

មើលទៅ Real Madrid មិនខ្វះលុយនាំចូលកីឡាករល្អៗទៅលេងជាមួយនោះទេ តែសំខាន់ថាតើកីឡាករដែលគេចង់បាននោះពេញចិត្តទៅឬអត់ ព្រោះថាក្លឹបកាន់តែមាន កាន់តែល្បី កញ្ចុំ Super stars ក៏កាន់តែច្រើន កាន់តែប្រជែងគ្នា៕