ការប្រកួតបាល់ទាត់ដណ្តើមពានរង្វាន់ពិភពលោក World Cup 2018 លើកទី ២១ ដែល​ធ្វើឡើង​នៅប្រទេសរុស្ស៊ី បានបញ្ចប់ទៅហើយ​ត្រឹមយប់​ថ្ងៃទី ១៥ខែកក្កដា។ ជើងឯកត្រូវបានរកឃើញ នោះគឺក្រុមបាល់ទាត់​ជម្រើសជាតិបារាំង ខណៈជើងឯករង គឺក្រូអាត ហើយលេខ ៣ គឺបែលហ្ស៊ិក និងលេខ ៤ គឺអង់គ្លេស។ ជាមួយលទ្ធផល​នៅ World Cup 2018 មានកីឡាករខ្លះក៏សប្បាយចិត្ត ប៉ុន្តែកីឡាករខ្លះទៀត មិនសប្បាយចិត្ត ហើយថែមទាំងនៅតែបន្ទោសខ្លួនឯងថាមិនអាចជួយ​ជម្រើសជាតិឲ្យបានល្អជាងនេះ។

តោះ! ពេលនេះ យើងមកមើលពីកំពូលកីឡាករ (Superstars) មួយចំនួន ដែលអាចនឹង​អវត្តមានពីព្រឹត្តិការណ៍ World Cup លើកទី ២២ នៅឆ្នាំ ២០២២ ដែលប្រទេសកាតាធ្វើជាម្ចាស់ផ្ទះ៖

#1 Sergio Aguero កីឡាករជម្រើសជាតិអាស្សង់ទីន

កីឡាកររបស់ក្លឹប​ Manchester City រូបនេះ នឹង​មានអាយុ ៣៤ឆ្នាំ ពេលព្រឹត្តិការណ៍ World Cup​ លើកក្រោយ ដែល​ធ្វើឡើង​នៅប្រទេសកាតា ចូលមកដល់។ សម្រាប់ Aguero ពេលដែលគេលេងតំណាងឲ្យជាតិ លើឆាកអន្តរជាតិ គេធ្វើមិនបានល្អទាំងស្រុង ដូចលេងនៅក្លឹបអាជីពឡើយ។ បញ្ហានេះ វាគឺជាសម្ពាធមួយ ដែលរូបគេផ្ទាល់​មិនចង់បង្ហាញខ្លួនទៀត។ យ៉ាងណាក៏ដោយ S. Aguero មិនទាន់បញ្ជាក់ពីការចូលនិវត្តន៍នៅឡើយទេ។

#2 Lionel Messi កីឡាករជម្រើសជាតិអាស្សង់ទីន

កីឡាកររូបនេះ បាន​បង្ហាញ​ខ្លួន​ក្នុងព្រឹត្តិការណ៍ World Cup ឲ្យជម្រើសជាតិអាស្សង់ទីន បានចំនួន ៤ដងហើយ ប៉ុន្តែជារឿយៗ Messi មិនបាន​នាំអាស្សង់ទីន ឲ្យ​បញ្ចប់ទៅដោយលទ្ធផល​រីករាយនោះទេ។ ជាក់ស្តែងកាលពី World Cup 2018 ថ្មីៗនេះ អាស្សង់ទីន បាន​ហាលអាវទៅផ្ទះវិញ​ត្រឹមវគ្គ ១៦ក្រុម​ចុងក្រោយ បន្ទាប់ពីបានចាញ់បារាំង ៤ទល់នឹង ៣។ កីឡាករដែលកំពុងលេងនៅក្លឹប Barcelona រូបនេះ នឹង​មានអាយុ ៣៥ឆ្នាំ ពេល World Cup 2022 នៅកាតាចូលមកដល់។ កត្តាអាយុ និង​សម្ពាធ ទំនងជាមិនអាចឲ្យ Messi បង្ហាញខ្លួនទៀតទេ តែយ៉ាងណា កីឡាកររូបនេះ មិនទាន់ប្រកាសពីការចូលនិវត្តន៍ពីក្រុមជម្រើសជាតិនោះឡើយ។

#3 Marcelo កីឡាករជម្រើសប្រេស៊ីល

ពេល World Cup 2022 នៅកាតា Marcelo នឹង​មាន​អាយុ ៣៤ឆ្នាំ។ ដូច្នេះ Marcelo អាចនឹងត្រូវអវត្តមាន ពេល World Cup លើកក្រោយ ក៏ព្រោះតែកត្តាអាយុ និង​ទម្រង់លេង។

#4 Luka Modric កីឡាករជម្រើសជាតិក្រូអាត

ពេល World Cup 2022 នៅកាតា Modric នឹងមានអាយុ ៣៧ឆ្នាំ។ Modric ធ្វើបានយ៉ាងល្អសម្រាប់ក្រូអាត ក្នុងអំឡុងពេលចូល World Cup ម្តងៗ ហើយថ្មីៗនេះ រូបគាត់ក៏ទើបតែទទួលបានពានរង្វាន់ Golden Ball ជាកីឡាករលេងបានល្អបំផុត បន្ទាប់ពីជួយឲ្យក្រូអាត​ ក្លាយជាជើងឯករងពីព្រឹត្តិការណ៍ World Cup 2018 នៅរុស្ស៊ី។

#5 Mohamed Salah កីឡាករជម្រើសជាតិអេហ្ស៊ីប

ពេលនេះ Mohamed Salah ទើបតែមានអាយុ ២៦ឆ្នាំប៉ុណ្ណោះ ហើយក៏ប្រហែលជាមិនមានបញ្ហាអាយុដែរ នៅ World Cup ឆ្នាំក្រោយ។ ប៉ុន្តែដោយសារតែមិនអាចជួយ​ក្រុម​ជម្រើសជាតិអេហ្ស៊ីប ឲ្យឈ្នះសូម្បីមួយប្រកួតពីព្រឹត្តិការណ៍ World Cup 2018 នៅរុស្ស៊ី Mo Salah ទទួលការប៉ះទង្គិចផ្នែកអារម្មណ៍ជាខ្លាំង ហើយគាត់ក៏មិនចង់ក្លាយជាមនុស្សមិនបានការលើឆាកអន្តរជាតិតំណាងអេហ្ស៊ីបនោះទេ។ មានភាពចចាមអារ៉ាមថា Mo Salah ចង់ចូលនិវត្តន៍ពីក្រុមជម្រើសជាតិ ប៉ុន្តែនៅមិនទាន់មានព័ត៌មានច្បាស់ការនៅឡើយទេ។ ជាការកត់សម្គាល់ Mohamed Salah លេងបានល្អបំផុត ឲ្យ​ក្លឹបហង្សក្រហម Liverpool ប៉ុន្តែពេលលេងនៅជម្រើសជាតិមិនបានល្អ ដូច្នេះវាជាសម្ពាធបំផុត។

#6 Cristiano Ronaldo កីឡាករជម្រើសជាតិព័រទុយហ្គាល់

ការពិតទៅ Cristiano Ronaldo បាន​ចាប់ផ្តើម​ព្រឹត្តិការណ៍ World Cup 2018 យ៉ាងល្អបំផុតឲ្យព័រទុយហ្គាល់​ ដោយ​ស៊ុត hat-trick បានដល់ទៅ ៣គ្រាប់ ហើយគាត់ក៏អាចជាបេក្ខភាពប្រជែងពានរង្វាន់ Top scorer ដើម្បី Golden Boot ផងដែរ ប៉ុន្តែអ្វីៗត្រូវបរាជ័យនៅពេលដែលព័រទុយហ្គាល់​ធ្លាប់​ចេញ​ត្រឹមវគ្គ ១៦ក្រុម​ចុងក្រោយ បន្ទាប់ពីប្រកួត​ចាញ់អ៊ុយរ៉ាហ្កាយ។ Ronaldo មិនសប្បាយ​ចិត្ត​នោះទេ ប៉ុន្តែគាត់នៅមិនទាន់ចេញ​សេចក្តីប្រកាសផ្លូវការពីការចូលនិវត្តន៍នៅឡើយទេ។

#7 Thomas Muller កីឡាករជម្រើសជាតិអាល្លឺម៉ង់

Muller បានជួយ​ឲ្យ​អាល្លឺម៉ងលើកពាន World Cup 2014 នៅក្នុងប្រទេសប្រេស៊ីល ប៉ុន្តែនៅក្នុង​ប្រទេសរុស្ស៊ី កាលពីពេលថ្មីៗនេះ អាល្លឺម៉ង់​ត្រូវទៅផ្ទះមុន​គេ ក្នុងចំណោម​ក្រុម​ដែលគេចាត់ទុកថាខ្លាំងផ្សេងទៀត។ អាល្លឺម៉ង់ ធ្លាក់ចេញពី World Cup 2018 ត្រឹមវគ្គ​ជម្រុះក្នុងពូល ហើយថែមទាំងប្រកួតចាញ់​ក្រុមអាស៊ី កូរ៉េខាងត្បូង ២ទល់នឹង០ទៀត។ គ្រូបង្វឹកអាល្លឺម៉ង់ លោក Joachim Low ដែល​នឹងបន្ត​ដឹកនាំក្រុម​រហូត​ដល់ World Cup 2022 មិនបាន​បង្ហាញសញ្ញាវិជ្ជមានណាមួយថា Muller អាចនឹងជាប់​ជម្រើសជាតិអាល្លឺម៉ង់ សម្រាប់ ៤ឆ្នាំទៀតនោះទេ។

#8 Sergio Ramos កីឡាករជម្រើសជាតិអេស្ប៉ាញ

ប្រធាន​ក្រុម​ជម្រើសជាតិអេស្ប៉ាញ និង Real Madrid រូបនេះ នឹង​មានអាយុ ៣៦ឆ្នាំ នៅឆ្នាំ ២០២២។ Ramos ទំនងជាចង់​ទុកឱកាសឲ្យ​ក្មេងៗអេស្ប៉ាញជំនាន់ក្រោយ ជាជាង​ចូលលេងដោយខ្លួនឯងនៅប្រទេសកាតា។

#9 Luis Suarez កីឡាករជម្រើសជាតិអ៊ុយរ៉ាហ្កាយ

គិតត្រឹម World Cup 2018 នេះ វាគឺជាលើកទី ៤ហើយ សម្រាប់ Suarez ដែល​លេងឲ្យជម្រើសជាតិ នៅ World Cup។ ប៉ុន្តែកីឡាករកូនសោ​សំខាន់របស់ Barcelona រូបនេះ នឹង​មានអាយុ ៣៦ឆ្នាំ ពេល World Cup នៅកាតា។ ដូច្នេះអ្វីដែលជាការរំពឹងទុក គឺ Suarez ចង់ពង្រឹងខ្លួនសម្រាប់ក្លឹបវិញ ហើយទុកឱកាសជម្រើសជាតិឲ្យ​ក្មេងជំនាន់ក្រោយ។

#10 Edinson Cavani កីឡាករជម្រើសជាតិអ៊ុយរ៉ាហ្កាយ

មិនខុសពី Suarez ខ្សែប្រយុទ្ធក្លឹប PSG រូបនេះ នឹងមានអាយុ ៣៥ឆ្នាំពេល World Cup 2022។ ដូច្នេះ គាត់ក៏ចង់ទុកឱកាសឲ្យក្មេងជំនាន់ក្រោយ​បានបង្ហាញខ្លួនលើកឆាកអន្តរជាតិផងដែរ ខណៈកេរ្តិ៍ឈ្មោះរបស់គាត់ ក៏ល្បីគ្រប់គ្រាន់ហើយដែរ៕

ប្រភព៖ Goal