បន្ទាប់ពីប្រឈម​នឹង​រឿងអាស្រូវ បង្កររបួសដោយចេតនាលើ​ខ្សែប្រយុទ្ធ Liverpool កីឡាករ Mohamed Salah កាលពីការប្រកួតវគ្គផ្តាច់ព្រ័ត្រ Champions League ២០១៨ ឥឡូវនេះ Sergio Ramos ប្រធានក្រុម​បាល់ទាត់ជម្រើសជាតិ​អេស្បាញ បាន​ចេញ​ចម្រៀងមួយ​បទ ដែល​ច្រៀង​ដោយ​ខ្លួន​ឯងតែម្តង ដើម្បីអន្ទង​ប្រិយមិត្ត ឲ្យ​​មក​មើល​ពីឆន្ទៈល្អរបស់ខ្លួនវិញ។

Ramos បាន​ចាប់​ដៃគូជាមួយ​អ្នក​ចម្រៀងអាជីពអេស្បាញឈ្មោះ Demarco Flamenco ដើម្បីបង្កើតរួមគ្នានូវបទចម្រៀងជាភាសាអេស្បាញ ​មាន​ចំណងជើងថា ‘Otra Estrella en tu Corazon’ ឬ មាន​ន័យ​ថា «តារាមួយ​ទៀតកំពុងរះក្នុងបេះដូងអ្នក»។ ហើយ​បទនេះ ទើបតែចេញផ្សាយ​ជាផ្លូវការ នៅ​ថ្ងៃទី ១មិថុនា ពោល​គឺរយៈពេល ១៤ថ្ងៃ មុនការ​ប្រកួតបាល់ទាត់ពិភពលោក World Cup នៅប្រទេសរុស្ស៊ី ចូលមក​ដល់។

អត្ថន័យ​ក្នុងចម្រៀងនេះ មានដូចជា៖ «មក​អេស្បាញ បញ្ចេញ​សម្លេងរបស់អ្នក ស្រែក​ឲ្យ​ខ្លាំងៗ ស្រែកពីបំណងអ្នក គិតថា​យើង​អាចសម្រេច​បានសមិទ្ធិផល​មួយដ៏ល្អបំផុត យើង​ប្រយុទ្ធទាំងអស់គ្នា ដើម្បីទទួលបានដួង​តារាមួយដែលពោរពេញដោយកិត្តិយស យើងត្រូវតែប្រឹង ហើយ La Roja (ក្រុមបាល់ទាត់ក្រហម​របស់អេស្បាញ ឬ ឈីលី) នឹង​បង្ហាញខ្លួន​ម្តងទៀត»។

គួរជម្រាបជូនថា នេះមិនមែនជាលើកទី ១ទេ ដែល​ខ្សែការពារ Real Madrid  វ័យ ៣២ ឆ្នាំរូបនេះ បាន​ប្រឡូកជាមួយសិល្បៈចម្រៀង។ កាលពី Euro 2016 គាត់ក៏បាន​ច្រៀង​បទចម្រៀងមួយបទមានចំណងជើងថា ‘La Roja Baila’ ផងដែរ។

ដើម្បីចង់ដឹងថា តើសម្លេងរបស់ Ramos ពេលច្រៀងមានទឹកដម​យ៉ាងណា សូមស្តាប់ និងទស្សនានៅទីនេះ៖