មក​ដល់​ពេលនេះ មាន​មនុស្សប្រមាណ ៤៣០,០០០នាក់ បាន​ចុះហត្ថលេខាលើញ្ញត្តិ​ ដែល​អំពាវនាវ​ឲ្យ​ស្ថាប័ន​បាល់ទាត់អឺរុប និង​ពិភពលោក​ UEFA និង FIFA ពិន័យ​លើ​កីឡាករ Sergio Ramos ដែល​បាន​បង្កររបួស​ដោយចេតនា លើ​ខ្សែប្រយុទ្ធ​ Liverpool កីឡាករអេហ្ស៊ីប Mohamed Salah អំឡុងពេល​ប្រកួត​វគ្គផ្តាច់ព្រ័ត្រ​ពានរង្វាន់បាល់ទាត់អឺរុប Champions League កាលពីយប់​ថ្ងៃសៅរ៍កន្លងទៅ នៅទីក្រុងគៀវ។

ក្រោយ​ពីការ​ប្រកួត​ដែល​គ្រប់គ្នាបានមើលឃើញថា កីឡាករអេស្ប៉ាញ ប្រធានក្រុមអធិរាជ Real Madrid គឺ Sergio Ramos បាន​គៀប​ដៃ Mo Salah អតីត​ខ្សែប្រយុទ្ធ​អេហ្ស៊ីប Mido បាន​លើកឡើងថា នេះជាចេតនាបង្កររបួស​របស់ Ramos។ តាម Mido វាមិនមែនជារឿងចៃដន្យ ឬអចេតនានោះទេ គឺ Ramos ចង់ឲ្យ Salah របួស​មិនបានលេងបន្តតែម្តង។

បន្ទាប់ពីការលើកឡើងនេះ អ្នក​គាំទ្របាន​បង្កើតញ្ញត្តិមួយ ក្នុង​គេហទំព័រ Change.org ដើម្បីអនុញ្ញាតឲ្យអ្នក​ដែលចង់​ឲ្យ Ramos ត្រូវទទួល​រងពិន័យ​ បាន​ចុះហត្ថលេខាគាំទ្រ​ចំពោះសំណើរនេះ។ គោលដៅ​របស់​ញ្ញត្តិនេះ គឺទទួលបាន​ហត្ថលេខាចំនួន ៥០០,០០០ រួចគេនឹងយកទៅដាក់ឲ្យ UEFA និង FIFA ធ្វើការសម្រេច។

គួររម្លឹកជូនថា ក្នុងការ​ប្រកួត​វគ្គផ្តាច់ព្រ័ត្រ កាលពីយប់​ថ្ងៃសៅរ៍ទី ២៦ឧសភា Real Madrid បាន​យក​ឈ្នះ Liverpool 3-1 ធ្វើឲ្យ​ក្រុម​អធិរាជសនេះ លើកពានរង្វាន់បាល់ទាត់អឺរុប ជាប់គ្នា ៣រដូវកាល (2016-2017-2018) និងជាពានលើកទី ១៣។ យ៉ាងណាមិញ ការប្រកួត​នេះ បាន​បញ្ចប់​ទៅដោយ​រូបភាពមិនរលូន ដោយ​មានអ្នក​គាំទ្រ ឬ អ្នក​ស្រលាញ់កីឡាករ Mo Salah ឬ Liverpool មួយ​ចំនួន យល់ថាជារឿងអយុត្តិធម៌ ឬ ក៏ជាជ័យ​ជម្នះដ៏ស្មោគគ្រោករបស់ Real Madrid៕