អគ្គ​លេខាធិការ​គណៈកម្មាធិការ​ជាតិអូឡាំពិកកម្ពុជា លោក​វ៉ាត់ ចំរើន​ បាន​ប្រាប់​វិទ្យុបារាំងអន្តរជាតិ RFI នៅថ្ងៃនេះថា ចំពោះ​ព្រឹត្តិការណ៍កីឡាជាតិលើកទី២ ដែល​នឹង​ចាប់​ផ្តើម​ពីថ្ងៃទី ២៥ឧសភា ដល់​ថ្ងៃទី ៤មិថុនានោះ នៅពហុកីឡដ្ឋានជាតិ គ្រោង​នឹង​ចំណាយ​ទឹកប្រាក់ជាង ១លានដុល្លារអាមេរិក។ ទឹកប្រាក់​ទាំងនោះ នឹង​ទទួលបាន​ពីច្រើនស្ថាប័ន ដូចជា ពី​រដ្ឋាភិបាល វិស័យ​ឯកជន និង​ពី​សប្បុរសជននានា។

តាម​លោក​វ៉ាត់ ចំរើន មក​ដល់ពេលនេះ ក្រុម​ការងារ​របស់លោក​បាន​រៀបចំ​ត្រៀម​ស្ទើររួច​ទាំងស្រុង​ហើយ នៅពហុកីឡដ្ឋានជាតិ។ ហើយព្រឹត្តិការណ៍កីឡាជាតិលើកទី ២ ដែលធ្វើឡើង​ក្រោម​ប្រធានបទ «​កីឡាដើម្បីសន្តិភាព និង​ការ​អភិវឌ្ឃន៍»នេះ នឹង​មាន​ទស្សនីយភាព​កីឡា និង​ការ​សម្តែង​ប្លែកៗ និង​គួរឲ្យ​ចាប់អារម្មណ៍ជាច្រើន លើសពីការ​រៀបចំ​កាលពីលើកទី១។​ តាម NOCC នៅឆ្នាំ ២០១៨នេះ នឹង​មានប្រភេទកីឡា ចំនួន ២៧ រួមជាមួយ​អត្តពលិក​ជាង ៤០០០ពាន់​ចូលរួម​សម្តែង និង​ប្រកួត​ប្រជែង ក្នុងព្រឹត្តិការណ៍នេះ។ កាលពីការរៀបចំលើកទី១ កាលពីឆ្នាំ ២០១៦ មានតែ ១៣ប្រភេទកីឡាទាំងនោះ បាន​ចូលរួម។​

គួរជម្រាបជូនថា ព្រឹត្តិការណ៍កីឡាជាតិ ធ្វើឡើង​ជារៀងរាល់​ ២ឆ្នាំម្តង ដើម្បី​ត្រៀម​សម្រាប់​ព្រឹត្តិការណ៍កីឡាស៊ីហ្គេម ដែល​កម្ពុជា ត្រូវធ្វើជាម្ចាស់​ផ្ទះជាលើកដំបូង នៅឆ្នាំ ២០២៣ខាងមុខ៕

រូបភាពពីទំព័រហ្វេសប៊ុក៖ NOCC

ស្តាប់បទសម្ភាសន៍ទាំងស្រុង រវាងលោក​វ៉ាត់ ចំរើន ជាមួ​យអ្នក​យកព័ត៌មានវិទ្យុបារាំង RFI៖ http://km.rfi.fr/Cambodia/interview-with-Vat-Chamrouen-22-05-2018