Pep Guardiola បានប្រកាសថា គាត់មាន​សេចក្តីសប្បាយរីករាយ និងរំភើបចិត្តជាខ្លាំង បន្ទាប់ពីបាន​ចុះហត្ថលេខាថ្មី បន្តកុងត្រាជាមួ​យ​ក្លឹបម្ចាស់​ជើងឯក Manchester City ៣ឆ្នាំទៀត ក្នុងរង្វង់ទឹកប្រាក់ប្រមាណ ៦០លានផោន។

លោក Guardiola ដែល​បាន​ដឹកនាំ​ក្រុម​មេឃខៀវ ឈ្នះពានរង្វាន់​បាល់ទាត់​អង់គ្លេស English Premier League រដូវកាលនេះ ជាមួយនឹង​កំណត់​ត្រា ១០០ពិន្ទុ បាន​បញ្ជាក់​ថា លោក​នឹង​បន្ត​នៅជាមួយ​ក្រុម​មេឃខៀវរហូត​ដល់ឆ្នាំ ២០២១។

កន្លង​មក​ អ្នក​ចាត់​ការទូទៅ​វ័យ ៤៧ឆ្នាំរូបនេះ បានទទួលប្រាក់ខែ ១៥លានផោន​ក្នុងមួយ​ឆ្នាំពេល​លោក​ទើបតែចុះកុងត្រាមក​ដឹកនាំ​ក្រុម​ Man City។ ហើយ​តាមរយៈការ​បន្ត​កុងត្រានេះ លោក Pep Guardiola នឹង​ក្លាយជា​អ្នក​ចាត់​ការ​ ដែល​ទទួលបាន​ប្រាក់បៀរវត្ស​ខ្ពស់ជាងគេ ក្នុង​ក្រប​ខណ្ឌ Premier League និង​ក្របខណ្ឌបាល់ទាត់​នៅអឺរុប។

បន្ទាប់​ពីកា​រចុះកុងត្រា លោក Guardiola បាន​បញ្ជាក់ថា «ខ្ញុំរីករាយ​នឹងធ្វើការជាមួយ​កីឡាករនៅទីនេះរាល់​ថ្ងៃ ហើយ​យើង​នឹង​ព្យាយាម​ធ្វើឲ្យ​បាន​ល្អបំផុត​នៅ​ឆ្នាំបន្ទាប់ទៀត។ ក្នុងនាមជាអ្នក​ចាត់ការ យើង​ត្រូវតែមាន​អារម្មណ៍ល្អជាមួយ​កីឡាករ ហើយក៏ត្រូវមានអារម្មណ៍ល្អជាមួយខ្លួនឯងដែរ»។ យ៉ាងណាក៏ដោយ លោក Pep បាន​ព្រមាន​ថា លោក​អាចនឹង​ចាកចេញពី Man City បាន​គ្រប់ពេល ប្រសិន​បើ​មាន​ការ​បំផ្លិតបំផ្លាញ​ចំពោះក្រុម​កីឡាករ ដែល​លោក​ខិត​ខំកសាង​មក​ជាយូរ និង​បាន​ចាត់​ទុក​ដូចជា​ឆ្អឹងខ្នងដ៏សំខាន់​របស់លោក​នោះ៕