បើតាមការឲ្យដឹងពីលោក ភា សុភ័ក្ត្រា គ្រូជំនួយក្រុមបាល់ទាត់ជម្រើសជាតិកម្ពុជា ក្នុងកម្មវិធីមួយថា ការប្រកួតវិញ្ញាសាបាល់ទាត់បុរសប្រចាំព្រឹត្តិការណ៍ស៊ីហ្គេម ២០២២ នៅវៀតណាម ខែឧសភា ខាងមុខ ក្រុមនីមួយៗអាចដាក់កីឡាករលើសអាយុ៣នាក់។

កាលឆ្នាំ២០១៩ ដែលជាឆ្នាំស៊ីហ្គេមនៅហ្វីលីពីន មានការកំណត់អាយុក្រោម២២ឆ្នាំ និងកីឡាករលើសអាយុមាន២នាក់។ កាលណោះកម្ពុជាបានជ្រើសរើសកីឡាករ កែវ​ សុខផេង និង រុឹង ប៊ុនហៀង ក្នុងនាមកូតាលើសអាយុ ហើយទទួល​បានចំណាត់ថ្នាក់លេខ៤។

ទាក់ទងទៅនឹងការរើសកីឡាករលើសអាយុនេះដែរ លោក ភា សុភ័ក្ត្រា បានបង្ហាញអារម្មណ៍ស្ដាយ ដែលចាន់ វឌ្ឍនាកា មានបញ្ហារបួសដាច់សរសៃដែលទាមទារឲ្យព្យាបាលយូរ។

ជំនួយការលោក Keisuke Honda សង្កត់ធ្ងន់ថា វឌ្ឍនាកា ជាប្រភេទខ្សែប្រយុទ្ធដែលបង្កគ្រោះថ្នាក់ដល់ខ្សែការពារគូប្រជែង។ លោកពិតជាស្ដាយដែលខ្សែប្រយុទ្ធបឹងកេតរូបនេះមានបញ្ហារបួសទៅវិញ។

គួរដឹងដែរថា គិតមកទល់ពេលនេះ ពុំទាន់មានការចាប់ពូលវិញ្ញាសាបាល់ទាត់បុរសនៅស៊ីហ្គេម ២០២២ នៅឡើយទេ៕