Arsenal និង Aston Villa ត្រូវបានគេរាយការណ៍មកថា កំពុងប្រជែងគ្នាក្នុងការខ្ចីជើងខ្សែបម្រើ Philippe Coutinho ពី FC Barcelona​ អំឡុងពេលទីផ្សារដោះដូរកីឡាករបើកនៅខែមករានេះ។

អតីតសមាជិក Inter Milan និង Liverpool មិនត្រូវបានស្ថិតនៅក្នុងគម្រោងប្រើប្រាស់របស់គ្រូបង្វឹកថ្មី Xavi ឡើយ ស្របពេលដែលបុរសវ័យ២៩ឆ្នាំកំពុងស្វះស្វែងក្នុងការរកក្លឹបលេងដើម្បីមានឱកាសជាប់ឈ្មោះនៅក្រុមជម្រើសជាតិប្រេស៊ីលក្នុងព្រឹត្តិការណ៍ FIFA World Cup 2022 នៅប្រទេសកាតា។

យ៉ាងណាក្តី Aston Villa ហាក់ដូចមានសង្ឃឹមច្រើនជាងក្រុមកាំភ្លើងធំក្នុងការនាំយកកីឡាករសាំបាមកជួយក្រុមតាមរយៈការទាក់ទងដោយផ្ទាល់ពីសំណាក់គ្រូបង្វឹក Steven Gerrard ដែលធ្លាប់ជាមិត្តរួមក្រុមចាស់ជាមួយគ្នានៅទឹកដី Anfield។

គួរឱ្យដឹងថា Philippe Coutinho បានសម្រេចចិត្តចាកចេញពីក្របខ័ណ្ឌ​ Premier League កាលពីឆ្នាំ២០១៨ ដោយអំឡុងពេល៤ឆ្នាំនៅទឹកដី Camp Nou រូបគេបានបង្ហាញខ្លួនឱ្យ FC Barcelona ចំនួន១០៦ប្រកួតតែប៉ុណ្ណោះ។