ជំនួបរវាង Sevilla និង RB Salzburg ប្រចាំពូល G ត្រូវបានកត់ត្រាចូលប្រវត្តិសាស្ត្រ UEFA Champions League នៅពេលអាជ្ញាកណ្ដាលចង្អុលផ្ដល់បាល់១១ម៉ែត្រដល់ទៅ៤ដង គិតត្រឹម៤២នាទីដំបូងនៃវគ្គទី១។

ជាក់ស្ដែងក្នុងនាទី១៣ ភាគីខាងក្រុមមកពីអូទ្រីសទទួល​បានបាល់១១ម៉ែត្រ ប៉ុន្តែកីឡាករ Karim Adeyemi ទាត់ចេញក្រៅ។

ដល់នាទី២១ Salzburg បាន១១ម៉ែត្រម្ដងទៀត ហើយលើកនេះ Luka Sucic ទាត់ចូលបានសម្រេច បន្ទាប់ពីអ្នកចាំទី Sevilla លោតខុស។

នាទី៣៧ ក្រុមជើងឯកលីគកំពូលអូទ្រីស បាន​បាល់១១ម៉ែត្រជាលើកទី៣ តែ Sucic ទាត់មិនចូលដូចមុនទេ។

ដល់នាទី៤២ ដល់វេន Sevilla បានបាល់១១ម៉ែត្រវិញម្ដង ហើយ Ivan Rakitic ទាត់បញ្ចូលទីតាមស្មើ។ ចប់ការប្រកួតក្រុមទាំង២ស្មើគ្នា១ទល់នឹង១ ដែលរកបានដោយបាល់១១ម៉ែត្រដូចគ្នា។

ការប្រកួតនេះក៏តានតឹងដោយសារតែមានកាតលឿងសរុប១១សន្លឹក ហើយក្នុងនោះ Thomas Delany របស់ Sevilla បានកាតលឿង២ដង ស្មើនឹងកាតក្រហមត្រូវចាកចេញពីទីលាន៕