(BC-99)

ដោយ​បាន​ឈ្នះ​ពាន​រង្វាន់​លីគ​កំពូល​របស់​អង់គ្លេស Frist Division និង Premier League ចំនួន​ ២០​ដង​ពុំ​ទាន់​មាន​ក្លិប​ណា​បំបែក​បាន​ទើប​ ​បិសាច​ក្រហម​ Manchester United ត្រូវ​បាន​គេ​ទទួល​ស្គាល់​ថា​ជា​ក្លិប​បាល់​ទាត់​អាជីពដែល​ប្រសព្វ​នូវ​ជោគ​ជ័យ​ដ៏​ខ្លាំង​បំផុត​មួយ​នៅ​លើ​ពិភពលោក។ រឿង​រ៉ាវ​របស់​ក្លិប​មួយ​នេះ​នៅ​មិន​ទាន់​បិទ​បញ្ចប់​នៅ​ឡើយ​ទេ​បើ​ទោះ​ជា​ពួក​គេ​ខក​ខាន​ដណ្តើម​ពាន​រង្វាន់កំពូល​អឺរ៉ុប UEFA Champions League ចាប់​តាំង​ពី​ឆ្នាំ​ ២០០៨ និង​ក្របខណ្ឌ​លីគ​អង់គ្លេស​កំពូល​ចាប់​តាំង​ពី​ឆ្នាំ ២០១៣ មក​ក្តី។

នា​សម័យ​បច្ចុប្បន្ន​នេះ Manchester United កំពុង​តែ​ដឹក​នាំ​ដោយ​អតីត​កីឡាករ​ឆ្នើម​របស់​ខ្លួន​គឺលោក Ole Gunnar Solksjaer ដែល​ទើប​តែ​ទិញ​បាន​កីឡាករ​ល្អៗ​នៅ​រដូវកាល​ថ្មី ២០២១-២២ នេះ​ដូច​ជា Jadon Sancho, Raphael Varanne ជា​ពិសេស​គឺ Cristiano Ronaldo ដែល​ធ្លាប់​បាន​ជួយ​ឱ្យ​ Man Utd ឈ្នះ​ពាន​រង្វាន់​ធំៗ​ពីមុន​ក៏​បាន​ត្រឡប់​មក​កាន់​ទ្រនំ​ចាស់​របស់​ខ្លួន​វិញ​ដែរ។​

ជា​មួយ​កីឡាករ​ខ្លាំងៗ​ដែល​មាន​​ស្រាប់​ដូចជា Pogba កំពុង​តែ​ឡើង​ទម្រង់​លេង Bruno Fernandez ដែល​នៅ​តែ​រក្សា​ការ​ស្រែក​ឃ្លាន​ចង់​បាន​ជ័យ​ជម្នះ​ក៏​ដូច​ជា​ខ្សែ​ការពារ​ដែល​កាន់​តែ​ស្វាហាប់ Arron Wan Bisaka, Hary Maguire, Luke Shaw ជា​ដើមនោះ​ បាន​ធ្វើ​ឱ្យ លោក Ole នឹក​ភ្នក​ដល់​ជំនាន់​ដ៏​រុង​រឿង​របស់​ខ្លួន​ថាកូន​ក្រុម​របស់​លោក​នា​សម័យ​នេះ​ក៏​​នឹងអា​ចប្រជែង​ពានរង្វាន់​បាន​យ៉ាង​ពេញ​មុខ​មាត់​ជា​មួយ​អតីត​ម្ចាស់​ជើង​ឯក Premier League ​រដូវ​កាល​ចាស់ Manchester City ឬ​ម្ចាស់​ពាន​រង្វាន់ UEFA Champions League រដូវកាល​ចាស់ Chelsea ជាក់​ជា​មិន​ខាន។

ចាប់តាំង​ពី Sir Alex Ferguson បានលាង​ដៃ​ចាក​ចេញ​ពី​មុខ​ដំណែង​ជា​អ្នក​ចាត់​ការណ៍​ទូទៅនៅ​ឆ្នាំ​ ២០១៣ ​មកក្រុម Manchester United ​​ឈ្នះ​ពាន​ធំ​តែ​២​គត់​គឺពាន FA Cup នៅ​រដូវ​កាល ២០១៥-២០១៦ ដែល​មាន​លោក Luis Van Gaal ជា​អ្នក​ដឹក​នាំ​និង​ឈ្នះ​ពាន UEFA EUROPA League នៅរដូវ​កាល ២០១៦-២០១៧ ដែល​នៅ​ពេល​នោះ​លោក Jose Mourinho ជា​អ្នក​គ្រប់​គ្រង។

ក្រោយ​ពី​បណ្តេញ​លោក Mourinho ចេញ​ពី​ដំណែង Manchester United ត្រូវ​បាន​ចូល​មក​ដឹក​នាំ​ដោយ​លោក Ole Gunnar Solskjare ដែល​ជា​អតីត​កីឡាករ​អំឡុងទស្សវត្ស​ទី​៩០​ធ្លាប់​ជួយ​ឱ្យ​ក្រុម​មួយ​នេះ​ឈ្នះ​ពាន​រង្វាន់ Premier League ៦ សម័យ​ជា​ពិសេស​គឺ​ជា​ការ​ជួយ​ឱ្យ Man Utd ឈ្នះ​ Champions League នៅ​វិនាទី​ចុង​ក្រោយ​បំផុត​តាម​រយៈ​ការ​ស៊ុត​បាល់​បញ្ចូល​ទី​លើ​ Bayern Munich នៅ​ឆ្នាំ ១៩៩៩ ​​តែ​ក្នុង​នាម​ជា​អ្នក​ដឹក​នាំ​លោក​ជួយ​ Man Utd បាន​ត្រឹម​តែ​ជាជើង​ឯក​រង Premier League ២ រដូវកាល​ចុង​ក្រោយ​នេះ​នឹង​ជា​ជើង​ឯក​រង UEFA EUROPA League នៅ​រដូវ​កាល​មុន​នេះ​តែ​ប៉ុណ្ណោះ។​

សំណួរ​កំពុង​តែ​ឋិត​នៅ​ក្នុង​ខួរ​ក្បាល​អ្នកគាំទ្រ​នា​ពេល​នេះ​ថា តើ​កីឡាករ​របស់ Manchester United នៅ​រដូវ​កាល​នេះ​ល្មម​គ្រប់​គ្រាន់​ប្រជែង​បាន​ពាន​ហើយ​ឬ​នៅ​ ឬ​ក៏​បាន​ត្រឹម​តែ​ឈរ​នៅ​ពី​ក្រោយ​ជើងឯក​ដូច​រដូវ​កាល​មុន​ទៀត?​