ក្លិបបាល់ទាត់ Liverpool បាន​ថ្កោលទោសចំពោះអង្វើដ៏អាម៉ាសពីជនមួយក្ដាប់តូច ក្រោយរថយន្ដដឹកកីឡាករ Real Madrid ត្រូវបានគេគប់ ពេលធ្វើដំណើរដល់កីឡដ្ឋាន Anfield មុនការប្រកួត UEFA Champions League ជើងទី២ វគ្គ៨ក្រុម ចុងក្រោយ។

ស៊ុមកញ្ចក់មួយផ្ទាំងត្រូវបានខ្ទេច ហើយបុគ្គលិក Liverpool បានឃើញ និងសម្អាតកម្ទេចកម្ទីដែលជ្រុះលើដី។

អ្នកនាំពាក្យ Liverpool មួយរូបនិយាយថា “៖យើងសូមថ្កោលទោសកម្មភាពបំផ្លិចបំផ្លាញនេះ។ វាជាទង្វ់ើដែលមិនអាចទទួល​យកបាន បង្កឡើងដោយជនមួយក្ដាប់តូច។ យើងសូមអភ័យទោសដល់ក្រុមភ្ញៀវចំពោះហេតុការណ៍នេះ ហើយយើងនឹងសហការជាមួយសមត្ថកិច្ចដើម្បីវែកមុខជនបង្ក”។

សមត្ថកិច្ចនិយាយថា មានមនុស្សខ្ទង់៤០០នាក់ស្ថិតនៅខាងក្រៅកីឡដ្ឋាន ហើយបានស្រែកឌឺដងពេលរថយន្ដក្លិប Real Madrid បរចូល។

សម្រាប់លទ្ធផលនៃការប្រកួតជើងទី២ ក្រុមទាំង២ស្មើគ្នា០ទល់នឹង០។ ដូច្នេះមានន័យថា Real Madrid ឡើងទៅកាន់វគ្គបន្ត ដោយសារតែបានឈ្នះ៣ទល់នឹង១ កាលជើងទីមួយ។ ក្រុមលោក Zinedine Zidane ត្រូវជួប Chelsea នៅថ្ងៃទី២៨ ខែមេសា សម្រាប់ជើងទីមួយ៕