ទាក់ទងនិងការត្រឡប់មកកាន់ស្តេចស Real Madrid របស់ James Rodriguez ក្រោយពីបញ្ចប់កុងត្រាខ្ជីជើងពី Bayern Munich ពេលនេះជម្រើសនៃការលេងក្រោមការដឹងនាំរបស់គ្រូបង្វឹក Zinedine Zidane គឺជាកង្វល់របស់ខ្សែប្រយុទ្ធជនជាតិកូឡុំប៊ី ដែលអាចនិងមិនជាប់ក្នុងជម្រើសប្រើប្រាស់របស់គ្រូបង្វឹកជនជាតិបារាំង។

តែកន្លងមកនេះ James Rodriguez ត្រូវបានផ្សារភ្ជាប់ទៅនឹងការផ្លាស់ទៅកាន់ At.Madrid ក្រោយពីដឹងថាកីឡាករវ័យ ២៨ឆ្នាំ មិនស្ថិតក្នុងផែនការរបស់ Zinedine Zidane នៅរដូវកាលក្រោយនោះទេ។

ប៉ុន្តែនេះគ្រាន់តែជាពាក្យចចាមអារ៉ាមអំពីកិច្ចព្រមព្រៀងប៉ុណ្ណោះ ខណៈដែលប្រធានក្លឹបរបស់ At.Madrid គឺលោក Enrique Cerezo ធ្លាប់បានបង្ហើបថាមិនមានកិច្ចព្រមព្រៀងទិញដូរកីឡាករណាមួយពី Real Madrid ទេ បើទោះបីជាក្លឹបកំពុងចាប់អារម្មណ៏លើ James ក៏ដោយ។ រដូវកាលមុន At.Madrid បានចុះហត្ថលេខារួចហើយលើកីឡាករ Marcos Llorente និង Mario Hermoso ពីក្លិប Real Madrid។

James Rodriguez ត្រូវបាន Bayern Munich ខ្ជីជើងពី Real Madrid កាលពីឆ្នាំ ២០១៧ ចំនួន ២រដូវកាល​ ដោយចូលលេងបាន ៦៧ប្រកួត និងស៊ុតបញ្ចូលទីបាន​ ១៥គ្រាប់៕