មិនត្រឹមតែក្លឹប La Nucia ​របស់​អេស្ប៉ាញទេដែលចង់អោយកីឡាករកម្ពុជាទាំងពីរដែលមាន ច្រឹង ពលរដ្ឋ និង ស៊ិន កក្កដា ទៅចូលរួមចូលរួម​ជាមួយ​កម្មវិធី Training Camp ​របស់​ពួកគេ​ សូម្បីតែចៅហ្វាយនៅក្នុងសង្កាត់ La Nucia ក្រុង Valencia ក៏បានគាំទ្រចំពោះវត្តមានរបស់ កីឡាករវ័យក្មេងកម្ពុជាទាំងនេះដែរ ដើម្បីអភិវឌ្ឍន៍វិស័យបាល់ទាត់ក្នុងតំបន់របស់គាត់ អោយកាន់តែរីកចម្រើនបន្ថែមទៀត នេះបើតាមការអោយដឹងរបស់ភ្នាក់ងារ កីឡាករទាំងពីរនេះ។

ក្លិប CF La Nucia ឬ ឈ្មោះពេញ Club de Futbol La Nucia ​បាន​បញ្ជាក់​យ៉ាង​ច្បាស់​ថា​ពួកគេ​អញ្ជើញ​កីឡាករ​កម្ពុជា​ទៅ ​ចូល​រួម​កម្មវិធី​ខាង​លើ​ដើម្បី​អភិវឌ្ឍ​សមត្ថភាព​បន្ថែម។ កម្មវិធី​ចាប់​ផ្ដើម​ពី​ខែ​មិថុនា​ឆ្នាំ​២០១៨​នេះ ​រហូត​ដល់​ខែ​មិថុនា​ឆ្នាំ​២០២០​ឯ​ណោះ។ ការ​ហាត់​រៀន​ពី​បាល់ទាត់​នៅ​តំបន់​អឺរ៉ុប​នេះ ​នឹង​ធ្វើ​ឡើង​៥​ថ្ងៃ ក្នុង​មួយ​សប្ដាហ៍ និងមានការប្រកួត​​មិត្តភាព រៀង​រាល់​ចុង​សប្ដាហ៍ ផងដែរ ។

ស៊ិន កក្កដា

ស៊ិន កក្កដា ដែលជាយុវជនរបស់ក្លិបភ្នំពេញក្រោន និង ច្រឹង ពលរដ្ឋ សមាជិករបស់ក្លិប ក្រសួងការពារជាតិ ព្រមព្រៀងចំពោះលក្ខខណ្ឌផ្ទាល់ខ្លួនរួចអស់ហើយ ពោលរង់ចាំតែ ទិដ្ឋាការស្ថានទូតប៉ុណ្ណោះ។ បើសិនមានការយល់ព្រមពីស្ថានទូតនោះអ្នកទាំងពីរនឹងចេញទៅអេស្ប៉ាញ នាខែ កក្កដា ខាងមុខ ។

ច្រឹង ពលរដ្ឋ

ក្លិប CF La Nucia កកើតនៅឆ្នាំ ១៩៩៥ ដែលស្ថិតនៅក្រុង Valencia លេងនៅក្របខ័ណ្ឌ Tercera Division។ ក្របខ័ណ្ឌ Tercera Division ស្ថិតនៅលំដាប់ទី៤ នៃលីគបាល់ទាត់ប្រទេសអេស្ប៉ាញ បន្ទាប់ពីលីគលំដាប់ទី ១ La Liga លីគលំដាប់ទី២ Segunda División និង លីគលំដាប់ទី៣ Segunda B ៕

CF La Nucia