គ្រូបង្វឹក​ក្រុម​ហង្សក្រហម​ Liverpool លោក Jurgen Klopp បាន​និយាយថា លោក​មានអារម្មណ៍អាណិតអាសូរ​ចំពោះអ្នក​ចាំទី កីឡាករ Loris Karius ទោះបីជាកីឡាកររូបនេះ បាន​បង្កើត​កំហុស​ដល់ទៅ ២ដង ដែលហាក់ដូចជាជួយ​ឲ្យ​ Real Madrid ឈ្នះពានរង្វាន់ Champions League ក៏ដោយ។

លោក Klopp បាន​និយាយថា កំហុស​លើកទី ២ កើតចេញពីកំហុស​លើកទី ១ ប៉ុន្តែវាពិ​តជាពិបាក​គ្រប់គ្រង​ស្ថានការណ៍ខ្លាំងណាស់។ លោក​បាន​បន្តថា Loris ដឹងពីរឿងនេះ ហើយគេ​ក៏មានភាពអាម៉ាស់​ចំពោះ​ការប្រកួតនេះដែរ។ ដូច្នេះលោក​អាណិត​គេ ហើយ​នៅតែចាត់​ទុក​គេថាជាក្មេងដ៏អស្ចារ្យម្នាក់។ ចំពោះលោក Klopp អ្នកចាំទី Karius ធ្វើបានល្អ ក្នុងពេលកន្លងមក ទើបតែលើកនេះ គេភ្លាត់ស្នៀតខ្លាំងតែម្តង។

គួររម្លឹកជូនថា Karius បាន​ភ្លាត់ស្នៀត​ចំពោះគ្រាប់បាល់ទី១ របស់ Real Madrid ដែល​ធ្វើបានដោយ​កីឡាករ Karim Benzema បន្ទាប់​មក​ គេក៏បាន​ភ្លាត់​ស្នៀត​ចំពោះគ្រាប់បាល់ទី៣ របស់ Gareth Bale ផងដែរ។ ប្រិយមិត្តលើបណ្តាយ​សង្គម​ភាគច្រើន បាន​ចំអក​ថា អ្នក​ចាំទីរូបនេះ ជា​បញ្ហាដែលធ្វើឲ្យ Liverpool ចាញ់។ តែយ៉ាងណាចំពោះកីឡាករ និង​គ្រូបង្វឹក​របស់ Liverpool នេះគឺជាកំហុស​អចេតនា ហើយពួកគេ​មិន​បាន​បន្ទោសលើ Karius នោះទេ។

គួរជម្រាបជូនដែរថា តាំងពីចូល​មក​ដឹកនាំ Liverpool កាលពីឆ្នាំ ២០១៥ លោក Jurgen Klopp ពុំដែលដឹកនាំ​ក្រុម​ឲ្យទទួល​បាន​ពានរង្វាន់​នោះទេ តែលោក​បាន​នាំក្រុម​ឲ្យ​ឡើង​ដល់​វគ្គផ្តាច់ព្រ័ត្រជានិច្ចកាល៕

ទស្សនាវីដេអូ Highlight ពីការប្រកួតយប់មិញ៖ https://www.youtube.com/watch?v=Gs4QG1pHBlU