គ្រូបង្វឹក​ក្រុម​ហង្សក្រហម Liverpool លោក Jurgen Klopp បាន​បញ្ជាក់​នៅក្នុងសន្និសីទកាសែតក្រោយ​បញ្ចប់​ការ​ប្រកួត​វគ្គផ្តាច់ព្រ័ត្រ​ពាន​រង្វាន់​បាល់ទាត់​អឺរុប Champions League កាលពីយប់មិញ​ថា របួសស្មា​របស់ Mohamed Salah មានលក្ខណៈ «ធ្ងន់ធ្ងរខ្លាំង»។

លោក Klopp បាន​និយាយ​ថា «របួស​នេះគឺធ្ងន់ធ្ងរខ្លាំងណាស់ …»។ លោក​បន្តថា៖ « Salah ត្រូវបាន​បញ្ជូន​ទៅធ្វើ X-ray ក្នុងមន្ទីរពេទ្យ ទីក្រុងគៀវ ភ្លាមៗក្រោយ​ពេល​ត្រូវរបួស។ មើលទៅគេ​អាចប៉ះពាល់ខ្លាំងលើឆ្អឹងដងកាំបិត ឬ ស្មា។ មើលទៅមិនល្អនោះទេ»។

គួរជម្រាបជូនថា កាលពី​យប់មិញ Mohamed Salah ដែលជាកូន​សោរ​ដ៏សំខាន់​របស់​ Liverpool ត្រូវបង្ខំចិត្ត​ប្តូរចេញ​ទាំងទឹកភ្នែក អំឡុងនាទីទី ៣០ បន្ទាប់ពីកីឡាកររបស់ Real Madrid គឺ Sergio Ramos បាន​មក​គៀបដៃគេ ហើយ​បង្ករឲ្យ​រងរបួសខ្លាំង។ Liverpool ដោយ​គ្មាន Salah តាំងពីតង់ទី១ បានត្រឹមបញ្ចប់​ក្នុងលទ្ធផល 1-3 ហើយ​ទីបំផុត​ក្លឹប​អធិរាជស Real Madrid ក៏បន្ត​លើកពានរង្វាន់​បាល់ទាត់អឺរុប UEFA Champions League បីរដូវកាលជាប់គ្នា និងជាពានលើកទី ១៣៕