លោក li Xiaopeng គ្រូបង្គោលក្រុមបាល់ទាត់ជម្រើសជាតិចិនទទួលស្គាល់ថា ក្រុមរបស់ខ្លួននៅមិនទាន់គុណភាពគ្រប់គ្រាន់ដើម្បីចូលរួមជុំចុងក្រោយ FIFA World Cup នៅឡើយទេ ដោយសារតែមានគម្លាតឆ្ងាយពីក្រុមធំៗមួយចំនួនទៀតក្នុងតំបន់។

គ្រូបង្វឹកប្រទេសមហាអំណាចសេដ្ឋកិច្ចខាងលើថ្លែងបែបនេះមុនវគ្គជម្រុះ FIFA World Cup 2022 ដំណាក់កាលទី៣ ដែលត្រូវប៉ះអូម៉ង់។ លោកបានឆ្លើយតបទៅកាន់អ្នកសារព័ត៌មានថា “៖មិនទាន់មានកម្លាំងគ្រប់គ្រាន់ទេ។”

យ៉ាងណា មុនជំនួបចុងក្រោយប្រចាំពូល លោក Li សង្ឃឹមថា កូនក្រុមអាចឆក់យកឱកាសក្រសោបយកលទ្ធផលល្អបាន។

“គ្រប់ប្រកួតសុទ្ធតែសំខាន់សម្រាប់យើង។ អ្វីដែលយើងត្រូវធ្វើ គឺត្រូវ​លេងឲ្យបានល្អ និងបង្ហាញពីកម្រិតរបស់យើង។ សង្ឃឹមថា កីឡាករមានអារម្មណ៍ល្អ និងផ្ដោតលើការប្រកួតបានល្អ។” លោក Li បន្ថែម។

ក្រុមជម្រើសជាតិចិនបានជ្រុះចេញពីវគ្គជម្រុះ FIFA World Cup 2022 ហើយ។ កន្លងមកចិនបានដាក់កីឡាករចូលសញ្ជាតិដែលមានមូលដ្ឋានពីអឺរ៉ុប និងប្រេស៊ីល មួយចំនួនចូលលេងដែរ តែនៅមិនអាចសម្រេចគោលដៅទៅ World Cup៕