នៅថ្ងៃសៅរ៍ ទី០៥ ខែមីនា ឆ្នាំ២០២២ នេះការប្រកួតបាល់ទាត់ក្របខណ្ឌ Cambodian Premier League រដូវកាល២០២២ នឹងចាប់ផ្ដើមជាផ្លូវការហើយ។

ទន្ទឹមនឹងនេះ ក្នុងថ្ងៃពិសេសជាមួយគ្នា​ បឹងកេតនឹងឆ្លៀតឱកាសរៀបចំកម្មវិធីពិសេសពី គឺការបង្ហាញខ្សែប្រយុទ្ធបរទេសថ្មីដែលជាកូតាទី៥។ មួយទៀត គឺការធ្វើពិធីលាដល់ខ្សែការពារ ហុង ផេង ដែលត្រូវចូលនិវត្តន៍។

កីឡាករបរទេសថ្មីទី៥ត្រូវបានប្រភពជិតដិតបញ្ជាក់ថា ជាជនជាតិហ្វាំងឡង់ និងចូលបង្គ្រប់កូតាបរទេសទី៥ បន្ទាប់ពីការចាកចេញរបស់ខ្សែប្រយុទ្ធកាមេរូន Abee Ndjoo។

សម្រាប់ខ្សែការពារ ហុង ផេង បានចូលរួមជាមួយបឹងកេតក្នុងឆ្នាំ២០១៥ និងរួមចំណែកឈ្នះពានលីគកំពូល ២០១៦, ២០១៧ និង២០២០ ព្រមទាំងពានសម្ដេចតេជោ ២០១៩។ ជាងមួយឆ្នាំមកហើយដែលគេមិនដែលបានចូលលេង ព្រោះរបួសសរសៃជង្គង់។

គួរដឹងដែរថា បឹងកេតត្រូវទទួលភ្ញៀវណាហ្គាវើលដ៍ នៅវេលាម៉ោង៣និង៤៥នាទីរសៀល៕