បច្ចុប្បន្នការប្រជែងយកតំណែង១១នាក់នៅហង្សក្រហម Liverpool មិនមែនជារឿងងាយស្រួលនោះទេ ទាំងប្រព័ន្ធខ្សែការពារដែលកំពុងមានភាពរឹងមាំខ្លំាង គួបផ្សំអ្នកចាំទី Alisson ឡើងដៃជាដល់កំពូល តរហូតដល់បំរើ និងប្រយុទ្ធស៊ុតតែមានឥទ្ធិពលទាំងអស់។

ទំរង់លេងល្អ បូករួមទាំងកីឡាករមានសមត្ថភាពបានធ្វើអោយពួកគេក្លាយជាជើងឯក UEFA Champions League ៦សម័យ នៅរដូវកាលនេះ។ ហើយក៏ធ្វើអោយមានសំណួរមួយបានកើតឡើងថា តើ Liverpool គួរតែពង្រឹងចន្លោះប្រហោងត្រង់កន្លែងណាខ្លះនៅរដូវកាលក្រោយ?

បញ្ហានេះលោក Klopp បានដឹងច្បាស់ណាស់ថាតើគួររៀបចំដោយរបៀបម៉េច? បើទោះជាកីឡាកររបស់ពួកគេមួយចំនួនកំពុងត្រូវបានក្លឹបផ្សេងចាប់អារម្មណ៏ចង់ទិញយកក៏ដោយ។

រឿងមួយដែលកំពុងតែធ្វើអោយប្រិយមិត្តរបស់ហង្សក្រហមមានការពេញចិត្តជាខ្លាំងគឺ ការតាមប្រមាញ់ខ្សែប្រយុទ្ធ Ousmane Dembele ពីក្លឹបអ្នកមានបុណ្យ Barcelona។ កីឡាករវ័យ២២ឆ្នាំ ជារ៉ាដាដ៏កៀកបំផុតរបស់លោក Klopp ដើម្បីពង្រឹងប្រព័ន្ធប្រយុទ្ធនៅរដូវកាលក្រោយ ខណៈដែល Firmino ក៏កំពុងមានបញ្ហារបួសខ្លះៗនៅជាប់ខ្លួនផងដែរ។

វាជារឿងទៅរួចមួយដែរក្នងការមកកាន់ទឹកដី Anfield ព្រោះកីឡាករជនជាតិបារាំងមិនស្ថិតក្នុងក្រសែភ្នែករបស់គ្រូបង្វឹក Ernesto Valverde នោះទេចាប់តាំងពីឆ្នាំ២០១៧មក ហើយចង់លក់រូបគេចេញទៀត ដោយក្លឹបក៏កំពុងពិចារណាចង់បាន Neymar មកវិញផងដែរ។

ក្នុងសន្និសិទ្ធិសារព័តមានមួយលោក Klopp បាននិយាយប្រាប់អ្នកសារព័តមានថា Dembele កំពុងមានទីផ្សារណាស់ ហើយលោកក៏ចាប់អារម្មណ៏គេខ្លាំងដែរ។ បើសិនមិនមែនការប្រែប្រួលលើការចង់បាននេះទេ Liverpool និងត្រូវចំណាយថវិការច្រើនគួរសមចំនួនជាង ១០០លានផោន ដើម្បីនាំយកខ្សែប្រយុទ្ធស្លាបរូបនេះមករួមក្លឹបនៅរដូវកាលក្រោយ ខណៈដែលក្លឹបទាំងសងខាងមានសញ្ញាវិជ្ជមាន លក់ចេញ ទិញចូលដូចគ្នា៕