អតីតកីឡាករល្បីឈ្មោះរបស់ឆ្មាខ្មៅ Sunderland ដែលធ្លាប់បានទទួលកម្រៃពលកម្មនៅលើវាលស្មៅចំនួន 227,000£ក្នុងមួយសប្តាហ៍មួយរូបបានបង្ហោះសារដ៏គួរអោយសោកសៅនៅលើបណ្តាញសង្គមដោយបានបញ្ជាក់ថា “ដកដាក់ចុះឡើង ពេលនេះក្នុងគណនីធនាគារខ្ញុំនៅសល់តែ600ផោនទេ”។ បុរសម្នាក់នេះត្រូវបសនគេចាំថាជា Asamoah Gyan ជាអតីតប្រធានក្រុមបាល់ទាត់ជម្រើសជាតិហ្គាណាផងដែរ។

ក្រោយពីបំពេញតួនាទីជាខ្សែប្រយុទ្ធរបស់ឆ្មាខ្មៅនៅអង់គ្លេសបានចំនួន2រដូវកាលរូបគេត្រូវបានដាក់អោយក្លិប Al-In របស់អារ៉ាប់ខ្ចីយកទៅលេងនៅឆ្នាំ2012។ ក្រោយពីក្លាយជាកីឡាករនៅលើទឹកដីមហាសេដ្ឋីប្រេងនៅឆ្នាំ2015 អ្នកទាត់បាល់អាជីពដែលមានជីវភាពឡូយឆាយតាមរយៈការបង្ហាញខ្លួនជាមួយគ្រឿងអលង្ការថ្លៃៗនិងឡានទំនើបៗសេរីខ្ពស់រូបនេះក៏បានផ្លាស់ទៅលេងអោយក្លិប Shanghai SIPG របស់ចិនដែលនៅទីនោះគេអាចរកចំណូលក្នុងមួយសប្តាហ៍ចំនួន 227,000ផោនក្នុងមួយសប្តាហ៍។

គេ​ធ្លាប់​ជា​មនុស្ស​ដែល​មាន​ភូមិគ្រិះ​ធំ​ទ្រនំ​ខ្ពស់ មាន​យន្តហោះ​ខ្នាត​តូច​ផ្ទាល់​ខ្លួន​និង​ដាក់​ជួល​អោយ​ក្រុម​ហ៊ុន​អាកាសចរ​ស៊ីវិល​របស់​ប្រទេស​ហ្គាណា​ ក៏​ប៉ុន្តែ​បែ​ប្រែ​ទៅ​ជា​អាប់អួរនៅពេលដែលគេលេងមិនសូវបានល្អ ស៊ុតក៏មិនសូវចូល និងមានរឿងរ៉ាវផ្សេងទៀតទាក់ទងទៅនិងការ​ចំណាយដូចមហាសេដ្ឋី ជាពិសេសនៅ​ពេលដែលគេប្តូរមកលេងនៅក្លិប Kayseryspor របស់ប្រទេស ទួរគី នាពេលបច្ចុប្បន្ននេះ។ ក្លិបនេះហើយដែល Gyan បានធ្លោយមាត់និយាយថានៅមិនទាន់បើកប្រាក់ខែអោយគេនៅឡើយទេខណៈដែលគេលេងបាន9ប្រកួតស៊ុតបាល់បញ្ចូលទីបានមួយគ្រាប់ដែរនោះ។

កីឡាករស៊ុតប៉េណាល់ទីមិនចូលនៅ World Cup 2006 រូបនេះត្រូវបានសារព័ត៌មានអន្តរជាតិលើកឡើងថា រូបគេបានខកខានក្នុងការទាក់ទងទៅប្រពន្ធនិងកូនចំនួន3នាក់នៅប្រទេសកំណើតអស់រយៈពេល3ខែមកហើយ សូម្បីតែថ្ងៃបុណ្យណូអែលដែលទើបតែកន្លងទៅនេះក៏គេមិនអើរពើរភ្ជាប់ទំនាក់ទំនងទៅរកពួកគេដែរ កូនៗនិងប្រពន្ធរបស់កីឡាករវ័យ33ឆ្នាំរូបនេះកំពុងព្រួយបារម្ភពីសុខទុក្ខរបស់ Gyan ជាខ្លាំង។

តែទន្ទឹមនិងនេះក៏មានព័ត៌មានបែកធ្លាយដែរថា Asamoah Gyan កំពុងប្តឹងលែងលះប្រពន្ធនិងទាមទារអោយពិនិត្យ DNA កូនៗរបស់គេដែលគេសង្ស័យថាមិនមែនជាកូនរបស់គេបង្កើតទៅវិញ ដោយសារ​តែ​គេ​ប្រច័ន្ទ​ប្រពន្ធ​ជាមួយ​និង​បង​ប្រុស​បង្កើត​របស់​ខ្លួន។ ចំពោះការប្រកាសធ្លាក់ខ្លួនថាសល់លុយតែ600ផោននេះដែរ ត្រូវបានគេចោទសួរទៅវិញថាជារឿងពិតឬអត់? ឬក៏លុយរបស់ Gyan ទុកនៅក្នុងគណីធនាគារផ្សេងមួយទៀត?