ក្រោយចាញ់ម៉ារ៉ុកដោយបាល់១១ម៉ែត្រកាត់សេចក្ដី ធ្លាក់វគ្គ១៦ក្រុមចុងក្រោយ FIFA World Cup 2022 លោក Luis Enrique គ្រូបង្គោលជម្រើសជាតិអេស្ប៉ាញ អះអាងទទួលខុសត្រូវចំពោះលទ្ធផលនេះ។

មុនឈានដល់ការកាត់សេចក្ដីដោយបាល់១១ម៉ែត្រ ក្រុមទាំង២ស្មើគ្នា០ទល់នឹង០។ លទ្ធផលនៃការទាត់ប៉េណាល់ទី ម៉ារ៉ុក ឈ្នះអេស្ប៉ាញ ៣ទល់នឹង០។

អតីតគ្រូបង្គោល Barcelona ថ្លែងបែបនេះ “៖ ទំនួលខុសត្រូវទាំងអស់គឺស្ថិតនៅលើខ្ញុំ ព្រោះខ្ញុំបានជ្រើសរើសអ្នកទាត់បាល់ប៉េណាល់ទី៣គ្រាប់ដំបូង។ សម្រាប់ការទាត់ផ្សេង គឺជាការសម្រេចចិត្តរបស់កីឡាករខ្លួនឯង។ យើងមិនបានទាត់ដល់គ្រាប់ទី៤ទេ។ Bono គឺជាអ្នកចាំទីដ៏ល្អម្នាក់ ហើយថ្ងៃនេះគាត់បានលេងយ៉ាងអស្ចារ្យ។”

អេ​ស្ប៉ា​ញ​គ្រប់គ្រងទីលាន​៧៧% ស៊ុត​១៣​ដង ច្រើន​ជាង​ម៉ា​រ៉ុ​ក​២​ដង តែស៊ុត​ចំ​គោលដៅ​តែ​ម្តង ។ បន្ទាប់​ពីលេង​បាន​១២០​នាទីដោយគ្មានគ្រាប់បាល់ ក៏ឈានដល់​ការ​ស៊ុត​បាល់​ប៉េណាល់ទី។ ដល់វគ្គនេះ Pablo Sarabia បានទាត់បាល់ដំបូងទៅបុកបង្គោលទី ហើយ Carlos Soler និង Sergio Busquets ត្រូវបានសង្គ្រោះដោយអ្នកចាំទី Yaccine Bono ។

ផ្ទុយ​ទៅ​វិញ ម៉ារ៉ុក​បាន​ខក​ខាន​តែ​ម្តង​នៅ​ពេល​ដែល Badr Benoun បរាជ័យ​ក្នុង​ការស៊ុត​អ្នក​ចាំទី Unai Simon ក្នុង​គ្រាប់ទី៣៕