អ្នកចាត់ការ Tottenham Hotspur លោក Antonio Conte យល់ថា យ៉ាងហោចណាស់ក្រុមរបស់លោកត្រូវការកីឡាករថ្មី២នាក់ទៀតដើម្បីអាចប្រជែងតំណែងជើងឯក Premier League រដូវកាលថ្មីបាន។

Spurs មាន១០ពិន្ទុស្មើក្រុមការពារជើងឯក Manchester City ក្រោយឈ្នះ៣ និងស្មើ១ពីការប្រកួត៤លើកដំបូងក្នុងរដូវកាលនេះ។

Conte បានផ្លាស់ប្ដូរតិចតួចក្នុងរដូវកាលនេះសម្រាប់ជម្រើស១១នាក់ដំបូង តែគិតថា ក្រុមរបស់លោកត្រូវតែពង្រឹងតំបន់សំខាន់ៗមួយចំនួន។

“បើប្រៀបជាមួយរដូវកាលមុន យើង​ត្រូវការពង្រឹងបន្ថែម។ ហើយបើចង់រីកចម្រើនជាងហ្នឹងទៀត យើងត្រូវការពេល អត់ធ្មត់ និង​មានការដោះដូរ អ៊ីចឹងមើលទៅយ៉ាងហោចណាស់ ក៏ត្រូវការ​បន្ថែមទៀតដែរ។”

គ្រូបង្វឹកជនជាតិអ៊ីតាលីបញ្ជាក់ថា បាននិយាយទៅកាន់ថ្នាក់ដឹកនាំហើយមុនទីផ្សារដោះដូរត្រូវបិទមុនម៉ោង១២យប់ថ្ងៃពុធ ទី៣១ ខែសីហា នេះ។ យ៉ាងណា លោកថា បានឬមិនបាន ក៏អូខេដែរ៕