ក្រុមបាល់បោះជិះរទេះនារីកម្ពុជាចាញ់ថៃបានមេដាយប្រាក់
ក្រុមបាល់បោះជិះរទេះជនពិការនារីកម្ពុជាបានប្រកួតចាញ់ក្រុមថៃ ទទួលបានមេដាយប្រាក់ ក្នុងព្រឹត្តិការណ៍កីឡាអាស៊ានប៉ារ៉ាហ្គេម នៅក្រុងសូឡូ ប្រទេសឥណ្ឌូនេស៊ី ថ្ងៃសុក្រ ទី០៥ ខែសីហា នេះ។
លទ្ធផលក្នុងការប្រកួត លើវិញ្ញាសា ៥នាក់ ទល់ ៥នាក់ កម្ពុជាចាញ់ថៃដោយពិន្ទុ ៥០-៣៩។ នេះក៏ជាបរាជ័យលើកទី២សម្រាប់កម្ពុជាក្នុងជំនួបជាមួយថៃ ដោយលើកមុន ចាញ់ក្នុងវគ្គវិលជុំសន្សំពិន្ទុ។
មុនឈានមកដល់វគ្គផ្ដាច់ព្រ័ត្រដណ្ដើមមេដាយមាសនេះ ក្រុមកម្ពុជាទទួលបានចំណាត់ថ្នាក់លេខ២ពេលប្រកួតវិលជុំក្នុងចំណោម៤ក្រុម ដោយឈ្នះឡាវ និងហ្វីលីពីន តែចាញ់ថៃ។ សម្រាប់ចំណាត់ថ្នាក់លេខ៣បានទៅលើក្រុមឡាវដែលឈ្នះហ្វីលីពីន ដោយលទ្ធផល ៥៨ទល់នឹង៩៕
