លោក Jurgen Klopp បានឈ្នះពានរង្វាន់​អ្នកចាត់ការ​ទូទៅ​ល្អ​បំផុត​ប្រចាំឆ្នាំរបស់ LMA Awards សម្រាប់​រដូវ​កាល ២០២១-២២។ Klopp ក៏ជាប់ជាអ្នកចាត់ការល្អបំផុតនៅ Premier League ដែរ បើទោះមិនបាន​ជួយ Liverpool ឈ្នះ​ពាន Premier League ​ក្តី។

ជាការពិត ទោះខកខានមិនបានជួយក្រុមលើកពានលីគកំពូលអង់គ្លេសរដូវកាលនេះ ប៉ុន្តែលោក Klopp បានដឹកនាំក្រុមលើកពាន EFL Cup និង FA Cup រួចទៅហើយ និងថែមទាំងឡើងទៅដណ្តើមពាន Champions League នៅវគ្គផ្តាច់ព្រ័ត្រជាមួយ Real Madrid ផង។ ការដឹកនាំដ៏លេចធ្លោនេះធ្វើអោយបុរសសញ្ជាតិអាល្លឺម៉ង់វ័យ៥៤ឆ្នាំ ជាប់ការបោះឆ្នោតជាអ្នកចាត់ការល្អបំផុត ពីសមាជិកអ្នកចាត់ការទូទៅរបស់សមាគមន៍ LMA ប្រចាំឆ្នាំ២០២២ និងជាលើកទី២បន្ទាប់ពីលោកបានឈ្នះពាននេះលើកដំបូងនៅរដូវកាល២០១៩-២០។

លោក Alex Ferguson អតីត​អ្នកចាត់ការ​ឆ្នើម Manchester United និងជាអ្នកទទួលបានពាននេះច្រើនជាងគេ ជាអ្នកផ្តល់ពាន LMA ដល់​លោក Klopp ផ្ទាល់ដៃ។ ​ក្រោយ​ឡើងទៅ​ដឹកនាំ​ក្រុម​Liverpool ចំនួន​៧​រដូវ​កាល Klopp ​បាន​ជួយ​Liverpool ​ឈ្នះ​ពានរង្វាន់ធំៗដូចជា UEFA Champions League កាលពី​រដូវ​កាល​ ២០១៨-១៩ និង​លើក​ពាន​ Premier League ​រដូវ​កាល២០១៩-២០។​

The Nightmare