Sergio Ramos ទើបតែចូលលេងបាន២ប្រកួតប៉ុណ្ណោះសម្រាប់ក្រុមថ្មី Paris Saint Germain ដោយបូកទាំងការប្រកួត Ligue 1 តទល់​ Lorient នៅថ្ងៃពុធ ទី២២ ខែធ្នូ។ ប៉ុន្តែគេទទួល​បានកាតក្រហមទៅហើយ។

ខ្សែការពារផ្ទេរពី Real Madrid ដោយឥតតម្លៃខ្លួនរូបនេះត្រូវបានប្ដូរចូលក្នុងវគ្គទី២ ក្នុងការប្រកួតដែលស្មើម្ចាស់ផ្ទះ Lorient ១ទល់នឹង១ ហើយគេមិនបានលេងដល់ចប់ទេ។

កីឡាករអេស្ប៉ាញបានកាតលឿងដំបូងក្នុងនាទី៨១ ដោយសារលើកជើងខ្ពស់ពេក ហើយ៤នាទីក្រោយមក គេបានកាតលឿងទី២ ស្មើនឹងកាតក្រហម បន្ទាប់ពីពាំងកីឡាកររបស់ Lorient ដែលកំពុងរត់សំដៅទី។ នេះជាកាតក្រហមទី២៧ក្នុងអាជីពរបស់ Ramos។

ក្នុងការប្រកួតនេះ Lorient បាននាំមុខមុន ដោយការទាត់ផុតដៃអ្នកចាំទី Keylor Navas ពីកីឡាករ Thomas Monconduit ក្នុងនាទី៤០។

ដល់នាទី៩០+១ទៅហើយទើប Mauro Icardi តាមស្មើឲ្យ PSG វិញ។

១៩ប្រកួតកន្លងមក PSG មាន៤៦ពិន្ទុស្ថិតនៅកំពូលតារាង ខណៈ Lorient នៅលេខ១៩មាន១៦ពិន្ទុ៕