Cristiano Ronaldo បានថ្កោលទោសសារព័ត៌មាន​អេស្ប៉ាញ និងអ៊ីតាលីដែលបានផ្សព្វផ្សាយរឿងចចាមអារ៉ាមពីអនាគតរបស់ខ្លួន។

លើទំព័របណ្ដាញសង្គម ប្រធានក្រុមជម្រើសជាតិព័រទុយហ្គាល់បានសរសេរ caption មួយបដិសេធពាក់ព័ន្ធនឹងការផ្លាស់ទៅ Real Madrid, Paris Saint Germain ឬ Manchester City។

“នៅអេស្ប៉ាញ មានព័ត៌មាន​និយាយពីខ្ញុំ និងក្លិបជាច្រើននៅលីគផ្សេងទៀត ដែលអត់មាននរណាអើពើអីសោះថា រឿងហ្នឹងពិតអត់។ ខ្ញុំសូមបញ្ជាក់ថា គួរកុំយកឈ្មោះខ្ញុំទៅផ្សាយផ្ដេសផ្ដាស។ ខ្ញុំកំពុងតែផ្ដោតលើការងារខ្ញុំ អាជីពខ្ញុំ និងត្រៀមសម្រាប់ការប្រកួតប្រជែង​ដែលនឹងចូលមកដល់។” នេះជាការប្រកាសពី Cristiano Ronaldo។

កីឡាករ Juventus និយាយថា ការផ្សាយព័ត៌មានមិនពិត គឺជាការមាក់ងាយមួយមិនត្រឹមតែដល់រូបគេទេ ថែមទាំងដល់ក្លិបដែលពាក់ព័ន្ធទៀត។

សារព័ត៌មានមួយចំនួននៅអ៊ីតាលី និងអេស្ប៉ាញរាយការណ៍ថា Ronaldo នឹងចេញពី Juventus អំឡុងទីផ្សារដោះដូរនេះ។ លោក Carlo Ancelotti គ្រូបង្គោល Real Madrid បានបញ្ជាក់ថា អត់មានអ្វីជាប់ពាក់ព័ន្ធនឹង Ronaldo ទេ។

នៅក្នុង Caption របស់ខ្លួនដដែល អតីតសមាជិក Manchester United សរសេរថា “៖អាជីពរបស់ខ្ញុំត្រូវបានកត់ត្រាដោយចំនួនពានរង្វាន់ និងកំណត់ត្រានានា។ វានៅសារមន្ទីកីឡដ្ឋាន Bernabeu និងក្នុងចិត្តរបស់ខ្ញុំ។ ខ្ញុំនៅតែមានទំនាក់ទំនងល្អជាមួយអ្នករាល់គ្នា ហើយខ្ញុំដឹងថា ខ្ញុំនៅតែស្ថិតក្នុងបេះដូងរបស់ពួកគេ។ អ្នកដែលស្និទ្ធជាមួយខ្ញុំប្រាកដជាដឹងថា ខ្ញុំយកចិត្តទុកដាក់លើការងារ។ និយាយតិច ធ្វើច្រើន។ នេះជាបាវចនារបស់ខ្ញុំតាំងពីខ្ញុំចាប់ផ្ដើមអាជីព។”។

Ronaldo កំពុងហ្វឹកហាត់យ៉ាងសកម្មជាមួយមិត្តរួមក្រុម Juventus ឯទៀតដើម្បីត្រៀមសប្ដាហ៍បើកឆាករដូវកាល២០២១/២០២២នៃក្របខណ្ឌកំពូលអ៊ីតាលី។ ក្រុមរហស្សនាមសេះបង្កង់ត្រូវប៉ះ Udinese នៅថ្ងៃទី២២ ខែសីហា៕