ខ្សែប្រយុទ្ធ Neymar កាលពីពេលថ្មីៗនេះបាននិយាយរឿងមួយដោយគួរឱ្យភ្ញាក់ផ្អើលថា ខ្លួនចង់ចាប់ដៃគូលេងជាមួយ Cristiano Ronaldo នាពេលខាងមុខនេះ។

ការនិយាយបែបនេះក្រោយពេលដែលកីឡាករសញ្ជាតិប្រេស៊ីលខាងលើទើបតែបន្តកុងត្រាថ្មីជាមួយ PSG ដល់ឆ្នាំ២០២៥ ខណៈដែល Cristiano Ronaldo ត្រូវគេរាយការណ៍មកថា ទំនងជាអាចចាកចេញពី Juventus ក្រោយចប់រដូវកាលនេះ។

អតីតសមាជិក Santos និង FC Barcelona បាននិយាយថា៖ “ខ្ញុំចង់លេងជាមួយ Cristiano Ronaldo នៅពេលខាងមុខ ព្រោះខ្ញុំធ្លាប់បានលេងជាមួយ Lionel Messi និង Kylian Mbappe រួចរាល់ហើយ។”

គួរឱ្យដឹងថា ក្រោយពីបន្តកុងត្រាថ្មីនៅបារាំង Neymar ទទួលបាន ១ឆ្នាំ ៣០លានអឺរ៉ូ ដោយក្នុង១ខែទទួលបាន ២.៥លានអឺរ៉ូ ហើយ១សប្តាហ៍ ៦សែន៣ម៉ឺនអឺរ៉ូ, ១ថ្ងៃ ៩ម៉ឺនអឺរ៉ូ, ១ម៉ោង ៤ពាន់អឺរ៉ូ និង១នាទី ៦០អឺរ៉ូ។