Zlatan Ibrahimovic មិនអាចទប់អារម្មណ៍ក្ដុកក្ដួលរបស់ខ្លួនបានទេអំឡុងសន្និសីទស្ដីពីការត្រៀមខ្លួនរបស់ក្រុមជម្រើសជាតិស៊ុយអែត។

ខ្សែប្រយុទ្ធវ័យ​៣៩ឆ្នាំរូបនេះថ្លែងថា បានពិភាក្សាយ៉ាងល្អិតល្អន់ជាមួយគ្រូបង្គោល លោក Janne Andersson មុនសម្រេចចិត្ត។ ការកោះហៅនេះមិនមែនដោយសារតែកេរ្ដិ៍ឈ្មោះទេ តែមកពីការលេងយ៉ាងល្អនៅ AC Milan រដូវកាលនេះ។

“Andersson និងខ្ញុំដឹងច្បាស់ថាអ្វីដែលល្អសម្រាប់ក្រុម។ អ៊ីចឹងហើយបានជាខ្ញុំឆ្លើយតបចំពោះគាត់។ ខ្ញុំជាកីឡាករល្អបំផុតលើលោក តែវាដូចជាការលេងរូបផ្គុំអ៊ីចឹង គឺខ្ញុំចូលមកបំពេញបទពិសោធរបស់ក្រុម។” នេះជាការលើកឡើងរបស់ Zlatan។

អតីតខ្សែប្រយុទ្ធ Manchester United បង្ហើបថា គេនឹងទទួល​បាន​តំណែងប្រធានក្រុម ហើយក៏បានសុំលេខ១១ពី Andreas Granqvist ថែមទៀត។ ដើមឡើយ Emile Forsberg ចង់ឲ្យលេខ១០ដល់ Zlatan តែគេមិនទទួល។

Zlatan Ibrahimovic បង្ហាញខ្លួនចុងក្រោយបង្អស់ក្នុងឆ្នាំ២០១៦ ហើយរកបាន៦២គ្រាប់ក្នុងចំណោម១១៦ប្រកួតសម្រាប់ស៊ុយអែត។ គេ និងមិត្តរួមក្រុមឯទៀតកំពុងត្រៀមវគ្គជម្រុះ FIFA World Cup 2022 តទល់ហ្សកហ្ស៊ី និងកូសូវ៉ូ។

រដូវកាលនេះ Zlatan រកបាន​១៥គ្រាប់ក្នុងក្របខណ្ឌកំពូលអ៊ីតាលី។ គេក្លាយជាកីឡាករចាស់ជាងគេដែលអាចរកបានចំនួនគ្រាប់បាល់បែបនេះ៕