នៅមុននេះបន្តិច​ គ្រូបង្វឹក Joachim Low បានចេញសេចក្តីប្រកាសមួយដ៏គួរឱ្យភ្ញាក់ផ្អើលមួយអំពីការ​លាឈប់ពីក្រុមជម្រើសជាតិអាល្លឺម៉ង់​ ក្រោយពីបញ្ចប់ព្រឹឹត្តិការណ៍ Euro 2020 ដែលធ្វើឡើងនៅខែមិថុនាខាងមុខ។

ជាការពិតកុងត្រារបស់បុរសវ័យ៦១ឆ្នាំនឹងផុតកំណត់ជាមួយក្រុមរហស្សនាមឥន្រ្ទីយ៍ដែករហូតដល់បញ្ចប់ការប្រកួតពានរង្វាន់ FIFA World Cup 2022 ប៉ុន្តែបន្ទាប់ពីមានការពិភាក្សាជាមួយសហព័ន្ធបាល់ទាត់អាល្លឺម៉ង់រួច ដោយ​ភាគីទាំងសងខាងបានសម្រេចលទ្ធផលចេញបែបនេះ ដោយសារតែវាគឺជាការសម្រេចផ្ទាល់ខ្លួនរបស់លោកតែម្តង។

គួរឱ្យដឹងថា​ លោក Joachim Low បានចូលមកដឹកនាំក្រុមជម្រើសជាតិអាល្លឺម៉ង់នៅឆ្នាំ២០០៦​ ដោយសមិទ្ធផលដ៏អស្ចារ្យរបស់ខ្លួនជាមួយក្រុមជម្រើសជាតិគឺការឈ្នះពានរង្វាន់ FIFA World Cup ឆ្នាំ២០១៤ នៅប្រទេសប្រេស៊ីលតែម្តង។