Liverpool កំពុងសម្លឹងមើលខ្សែការពារបន្ថែមទៀតដើម្បីជំនួសទីតាំង Virgil van Dijk ដែលមានបញ្ហារបួសសរសៃពួរជង្គង់ច្រើនខែមកហើយ។

ដោយឡែក David Alaba មិនចង់រួមរស់ជាមួយ Bayern Munich ទៀតទេ ដោយគេបានបដិសេធតកុងត្រាថ្មី។

សារព័ត៌មានមួយចំនួនលើកឡើងថា Alaba ត្រូវបានពិចារណាដោយក្លិបធំៗមួយចំនួនដូចជា Liverpool, Real Madrid, PSG និង Manchester United។ Liverpool ក៏បានសរសើរយ៉ាងខ្លាំងពីបច្ចេកទេស និងល្បឿន។

យ៉ាងណា អ្នកសារព័ត៌មានមួយរូបដែលមានជំហរគាំទ្រ Liverpool គឺនាង Melissa Reddy យល់ឃើញថា កីឡាករអូទ្រីសខាងលើមិនត្រូវខ្នាតក្រុមហង្សក្រហមទេ ព្រោះខ្សែការពារឯទៀតសុទ្ធតែខ្ពស់។ ជាក់ស្ដែង Van Dijk មានកម្ពស់ ១ម៉ែត្រ៩៣, Joel Matip ១ម៉ែត្រ៩៥ និង Joe Gomez ១ម៉ែត្រ៨៨ ខណៈ Alaba ត្រឹម១ម៉ែត្រ៨០។

និយាយពី Real Madrid វិញចង់បានខ្លាំងដូចគ្នា តែទំនងអល់អែករឿងប្រាក់ឈ្នួល ដោយសារថ្លៃនឿយហត់របស់ Alaba មានទំហំដល់ទៅ១៣លានអឺរ៉ូក្នុងមួយឆ្នាំក្រោយកាត់ពន្ធរួច។ ប្រសិនបើ Real Madrid ព្រមឲ្យទំហំប៉ុណ្ណឹង Alaba នឹងក្លាយជាកីឡាករបានប្រាក់ឈ្នួលច្រើនជាងគេនៅក្លិបអេស្ប៉ាញមួយនេះ ស្របពេលបច្ចុប្បន្ន គឺ Sergio Ramos មានប្រាក់ឈ្នួល១២លានអឺរ៉ូក្នុងមួយឆ្នាំ។

បើនិយាយពីសមត្ថភាពរបស់ David Alaba គឺគេអាចលេងទាំងការពារស្លាប និងកណ្ដាល។ រដូវកាលមុន គេរួមចំណែកជួយ Bayern Munich លើកពាន៣កម្មវិធី គឺ UEFA Champions League, Bundesliga និង German Cup៕