(BC-99)

គ្រូបង្វឹករបស់ក្លឹបមាន់ខ្នាយមាស Tottenham លោក Jose Mourinho ចង់នាំយកកីឡាករជើងចាស់របស់ក្លិប Real Madrid Luka Modric មកកាន់ក្លឹបវិញ។

បើ​យោង​ទៅ​លើ​សុពល​ភាព​កុងត្រារបស់ Modric ដែល​នឹង​បញ្ចប់​ជាមួយ Real Madrid នៅខែមិថុនាខាង​មុខ​នេះ​បាន​ធ្វើ​ឱ្យ​ខ្សែបម្រើ​ជម្រើស​ជាតិ​ក្រូអាត​រូប​នេះ​អាចសម្រេច​ធ្វើ​តាមមិត្តរួមក្រុម Gareth Bale ដោយត្រលប់ទៅ Tottenham វិញនៅខែក្រោយនេះ​តែ​ម្តង​។

នៅ​ក្នុង​កម្មវិធិធី​នៃ​​ទូរទស្សន៍​អេស្ប៉ាញ​ El Chiringuito ប្រធាន​ក្រុម​ហ៊ុន Okdiario លោក Eduardo Inda បាននិយាយអំពី​ការ​ចង់​បាន Modric ត្រឡប់​ទៅ​ជួយ​ក្លិប​ចាស់​វិញ​ដោយ​លោក​បាន​លើក​ឡើង​ថា​​៖“ទោះបីជាខ្ញុំគិតថាលោក Jose Mourinho នឹងជួប​ភាពស្មុគស្មាញក៏ដោយក៏គាត់នឹង​កោះ​ហៅកីឡាកររបស់ Real Madrid ម្នាក់ទៀត​ដែរ។ គាត់បានទូរស័ព្ទទៅ Luka Modric ហើយបានសួរគេថាតើចង់ត្រលប់ទៅក្រុមដែលគេ​ធ្លាប់ជួយ​មុនពេលទៅលេង​ឱ្យ Real Madrid ដែរឬទេ? ប៉ុន្តែ Modric បានប្រាប់គាត់ថាបំណងប្រាថ្នារបស់គេគឺចង់បញ្ចប់អាជីពបាល់ទាត់នៅ Real Madrid” ។

បើ​ទោះ​ជា​ព័ត៌មាន​មួយ​នេះ​ត្រូវ​បាន​គេ​ចុះ​ផ្សាយ​ទូទាំង​ទ្វីប​អឺរ៉ុប​យ៉ាង​ណា​ក៏​ដោយ​ក៏​គេ​នៅ​មិន​ទាន់​ឃើញ​មាន​ប្រតិកម្មណាមួយ​ឆ្លើយ​តប​ពី​លោក Jose Mourinho ឬក៏ក្លិប​ដែល​លោក​កំពុង​តែ​ដឹក​នាំ​នៅ​ឡើយ​ទេ។