(BC-99)

ក្រុមបិសាច​ក្រហម​ MANCHESTER UNITED ត្រូវ​បានរាយការន៍​អោយ​ដឹង​ថា​ជា​ក្លិប​ដែល​បាន​​ចំណាយ​ទឹកប្រាក់តិចបំផុតយក​ទៅ​វិនិយោគក្រុម​​របស់​ខ្លួន​បើ​ធៀបទៅ​នឹងក្លឹប​ ១៩ ទៀត​នៅ​ក្នុងក្របខណ្ឌ Premier League ស្របពេលដែលក្រុម Arsenal ក៏មានបញ្ហាក្នុង​ការ​ចំណាយ​លើ​ការ​អភិវឌ្ឍន៍​នេះ​ដែរ។

ក្រុមដែល​មាន​មូល​ដ្ឋាន​នៅ​ Old Trafford តែង​តែ​បាន​ឈរលើ​កំពូលតារាងក្នុង​ចំណោម​ក្លិប​បាល់​ទាត់​ដែល​មាន​ទ្រព្យ​សម្បត្តិ​ច្រើន​ជា​គេ​បំផុត​នៅ​ក្នុង​ពិភពលោក​នា​រយៈ​ពេល​ប៉ុន្មាន​ឆ្នាំ​ជាប់​គ្នា​កន្លង​មក​នេះ។ ប៉ុន្តែអ្វីៗហាក់ដូចជាកំពុងផ្លាស់ប្តូរកាន់តែអាក្រក់ទៅៗហើយ​ក៏​បាន​បង្កើត​ឱ្យមាន​ការ​ព្រួយបារម្ភចាប់តាំងពីដើមរដូវកាល ២០១៤-១៥ មក។

ក្នុងចន្លោះពីឆ្នាំ ២០១៤ ដល់ចុងរដូវកាល ២០១៨-១៩ Man Utd មានការវិនិយោគតិចបំផុតពីម្ចាស់​ក្លឹបដែល​ជា​ពពួក​មនុស្ស​ក្នុង​ត្រកូល​ Glazers ប្រសិន​បើ​គេ​ធៀប​ទៅ​នឹង​ក្លិបផ្សេងទៀតដែលស្ថិតក្នុងក្របខណ្ឌ​លំដាប់កំពូលមួយ​នេះ​។តាមពិតទៅម្ចាស់​ក្រុមបិសាចក្រហមពិតជាបានដក​​លុយពី​ប្រាក់​​ចំណេញ​យ៉ាង​ហោច​ ៨៩ លានផោនពីក្លិបនេះជា​រៀង​រាល់​ពាក់​កណ្តាល​រដូវ​កាល​ នេះ​បើយោងតាមសារព័ត៌មាន​ស្វីស Ramble បង្ហើប​អោយ​ដឹង​។ វាបាន​ធ្វើ​អោយ​លំហូរ​សាច់​ប្រាក់​របស់ Manchester United មិនមាន​ភាព​ច្បាស់​លាស់​ដូច​ក្រុមកំពូល​ទាំង​៦​ឯទៀតឡើយ។

បើ​ទោះ​ជា​ម្ចាស់​ក្លិប Glazers បាន​យក​លុយ​ពី​ក្លិប​ចំនួន ៨៩ ​លានផោន​ជាទៀង​ទាត់​ក៏​ដោយ​ក៏​ក្លិប​ Man Utd នៅ​តែ​រក​លុយ​មក​វិញ​បាន​យ៉ាង​ស្រួល ក៏​ប៉ុន្តែ​ប្រាក់​ចំណូល​ទាំង​នេះ​នៅ​តែ​ឋិត​នៅ​ក្នុង​កណ្តាប់​ដៃ​របស់​មហាសេដ្ឋី​អាមេរិច​រូប​នេះ​ដដែល រីឯប្រាក់​យក​ទៅ​ចាយ​ទិញ​កីឡាករ​គ្រាន់តែ​ចំណែក​ដ៏​តូច​ស្តើងនៃលុយ​ចំណេញដ៏មហាសាល​តែ​ប៉ុណ្ណោះ។

​​