ទោះក្រសោបបានតំណែងជើងឯកក្របខណ្ឌកំពូលអ៊ីតាលី Italian Serie A នៅរដូវកាល២០១៩/២០២០ តែបើប្រៀបធៀបទៅរដូវកាលមុនៗ Juventus ធ្វើមិនបានល្អឡើយ ជាពិសេសបន្ទាប់ពីបរាជ័យដោយសារ Cagliari និង AS Roma នៅថ្ងៃចុងក្រោយ។

ក្នុងនាមជាក្រុមជើងឯក ក្រុមសេះបង្កង់ចាញ់ដល់ទៅ៧ប្រកួត របូត៤៣គ្រាប់ និងទទួលបានត្រឹម៨៣ពិន្ទុ លើសក្រុមលេខពីរ Inter Milan ត្រឹមមួយពិន្ទុ ដែលជាកំណត់ត្រាដ៏អាក្រក់បំផុត ចំណោមការលើកពាន៩ឆ្នាំចុងក្រោយ។

នៅរដូវកាលនេះដែរ ក្រុមលោក Maurizio Sarri ក៏របូតពានក្នុងស្រុកពីរ គឺ Italian Super Cup និង Coppa Italia។ ពួកគេនៅសល់ពានអឺរ៉ុបមួយទៀត គឺ UEFA Champions League ត្រូវប្រជែងបន្តក្នុងវគ្គ១៦ក្រុមចុងក្រោយ។ កាលជើងទីមួយ Juventus ចាញ់ Lyon ០ទល់នឹង១។ ប្រសិនបើឈ្នះ ពួកគេនឹងឡើងទៅប៉ះក្រុមឈ្នះរវាង Manchester City និង Real Madrid ក្នុងវគ្គ៨ក្រុម។

លោក Maurizio Sarri អ្នកចាត់ការ Juventus លើកឡើងថា ក្រោយដឹងថា ឈ្នះជើងឯកអ៊ីតាលី កូនក្រុមរបស់លោកភាគច្រើនហាក់ធ្លាក់ចុះការប្ដេជ្ញាចិត្ត៕