Zidane ព្រមានដល់កូនក្រុមប្រយ័ត្នមិនបានឈ្នះអ្វីទាំងអស់
(BC-99)
លោក Zinedine Zidane កំពុងតែដឹកនាំក្រុមរបស់ខ្លួនឆ្ពោះទៅកាន់ការប្រជែងដណ្តើមយកតំណែងជើងឯក LaLiga ទាំងប្រផិតប្រផើយ តែលោកបានទទូចថា Real Madrid អាចនឹងមិនបានអ្វីសោះ បើទោះបីជាក្រុម Barcelona ដែលជាគូប្រជែងនៅពេលនេះហាក់ដូចជាកំពុងបាត់បង់ឱកាសក៏ដោយ។
Real Madrid បានឈរនៅលើកំពូលតារាង La Liga និងមានមួយពិន្ទុលើសគូប្រជែង FC Barcelona ហើយក៏នៅសល់មួយប្រកួតនៅក្នុងដៃផងដែរ។ ពួកគេនឹងធ្វើជាម្ចាស់ផ្ទះទទួល Getafe នាយប់ថ្ងៃពុធនេះដោយដាក់គោលដៅប្រកួតយកឈ្នះអោយទាល់តែបានដើម្បីខិតទៅអោយកៀកពានរង្វាន់ La Liga រដូវកាល ២០១៩-២០។
ទោះជាក្រុម Barca ត្រូវបានរារាំងផ្លូវមិនអោយមានពិន្ទុស្មើជាមួយ Real Madrid ដោយសារតែប្រកួតស្មើជាមួយ AT Madrid កាលពីយប់ម្សិលម៉ិញក៏ដោយក៏លោក Zinedine Zidane យល់ឃើញថាអ្វីៗមិននៅដដែលនោះទេ។ លោកបាននិយាយថា “Real Madrid ក៏អាចមានការថ្លោះធ្លោយដូច Barcelona អីចឹងដែរដូចនេះគេមិនត្រូវមើលស្រាលស្ថានភាពប៉ុន្មានប្រកួតដែលនៅសេសសល់ចុងរដូវកាលនេះឡើយ”។
ក្នុងន័យក្រើនរំឭកបន្ថែមដល់សមាជិកក្រុមរបស់ខ្លួនអតីតកីឡាកររបស់ Real Madrid រូបនេះបាននិយាយទៀតថា “យើងមិនទាន់បានឈ្នះអ្វីនៅឡើយទេ អ្វីៗនៅមិនទាន់ចប់នៅឡើយទេ យើងនៅសល់ការប្រកួតចំនួន៦ដងទៀត រីឯក្រុមដទៃក៏ចង់ឈ្នះដូចពួកយើងដែរ។ យើងត្រូវតែគិតអំពីការព្យាយាមឲ្យអស់ពីសមត្ថភាពដើម្បីឈ្នះ។ យើងលេងបានយ៉ាងល្អប៉ុន្តែពេលនេះយើងមិនទាន់មានអ្វីទេ” ។
