កាលពីដើមខែឧសភា Juventus បានធ្វើការកោះហៅកីឡាកររបស់ខ្លួនទាំងអស់ត្រឡប់មកវិញដើម្បីធ្វើការជួបជុំហ្វឹកហាត់ ក្រោយពេលដែលក្របខ័ណ្ឌ Serie A មានគម្រោងចាប់ផ្តើមប្រកួតឡើងវិញនៅខែក្រោយ បន្ទាប់ពីអត្រាអ្នកឆ្លងវីរុសកូវីដ១៩នៅក្នុងប្រទេសអ៊ីតាលីមានភាពថមថយចុះ។

សមាជិកមួយចំនួនបានធ្វើការហ្វឹកហាត់វិញជាបណ្តើរៗហើយតាមការកោះហៅ ដោយឡែកសម្រាប់ខ្សែប្រយុទ្ធ Cristiano Ronaldo នឹងត្រូវបង្ហាញខ្លួននៅទីលានហ្វឹកហាត់របស់ក្រុមរហស្សនាមសេះបង្កង់នៅថ្ងៃស្អែកនេះ ក្រោយពីត្រឡប់មកដល់ទីក្រុង Turin វិញហើយបានដាក់ខ្លួនដាច់ដោយឡែកបានរយៈពេល១៤ថ្ងៃរួចរាល់។

គួរឱ្យដឹងថា កាលពីចុងខែមេសា នាយករដ្ឋមន្រ្តីអ៊ីតាលី លោក Giuseppe Conte បានប្រកាសអនុញ្ញាតឱ្យកីឡាករទាំងអស់នៅក្របខ័ណ្ឌនឹងចាប់ផ្តើមហ្វឹកហាត់ជាលក្ខណៈឯកជន មុនពេលធ្វើការហ្វឹកហាត់ជាក្រុម ខណៈក្របខ័ណ្ឌ Serie A នឹងមានគម្រោងចាប់ផ្តើមប្រកួតឡើងវិញនៅថ្ងៃទី១៣ ខែឧសភាដើម្បីបញ្ចប់រដូវកាល២០១៩/២០របស់ខ្លួន។

យ៉ាងណាក្តី  រដ្ឋាភិបាល​ប្រទេស​អ៊ីតាលី​ក៏កំពុងតែនឹងពិចារណាដូចគ្នាក្នុងការ​បញ្ចប់​រដូវកាល​ Serie A រដូវកាលនេះផងដែរ បើសិន​ជា​ក្លឹប​ទាំងអស់និង​ក្រសួង​សុខាភិបាល​មិន​ឯកភាពគ្នាលើ​លក្ខខណ្ឌ​មួយចំនួនក្នុងការធានាអំពីសុវត្ថិភាពរបស់ក្រុមកីឡាករទាំងអស់។