សព្វថ្ងៃវិស័យបាល់ទាត់មានការរីកចំរើនខ្លាំងណាស់ សឹងតែគ្រប់វិស័យទាំងអស់ មិនថាបច្ចេកទេស សំភារៈនិយម ចំណូលរបស់កីឡាករនិងក្លឹប ជាដើម។ ដោយសារការរិកចំរើននេះហើយបានធ្វើអោយក្លឹបទាំងធំទាំងតូចជាច្រើនត្រូវការបុគ្គលមានសមត្ថភាពដើម្បីដឹកនាំក្លឹបអោយទទួលបានជ័យជំនះ។

សូម្បីតែកីឡាករផ្ទាល់នៅពេលដែលបញ្ចប់អាជីពរបស់ខ្លួនហើយក៏ដោយ ក៏ពួកគេនៅតែជាមុខសញ្ញាដ៏សំខាន់សំរាប់ម្ចាស់ក្លឹបនិមួយៗក្នុងការកោះហៅពួកគេអោយបន្តការងារជាគ្រូបង្វឹក រឺក៏ជាគ្រូជំនួយលើផ្នែកណាមួយជាបន្តទៀត។

ថ្ងៃនេះ Admin MSRSPORT និងដកស្រង់កីឡាឆ្នើមៗមួយចំនួនជំនាន់ឆ្នាំ៩០ ដែលបន្តអាជីពជាគ្រូបង្វឹកក្នុងពេលបច្ចុប្បន្ន ពួកគេទាំងនោះមានដូចជា​៖

1/ Frank Lampard

អតីតកីឡាករតោខៀវដ៏ជោគជ័យម្នាក់នេះ បញ្ចប់អាជីពបាល់ទាត់នៅក្នុងឆ្នាំ ២០១៦ ក្នុងវ័យ ៣៨ឆ្នាំជាមួយនិងក្លឹបចុងក្រោយរបស់គេគឺ New York City ក្នុងលីកកំពូលរបស់សហរដ្ឋអាមេរិក។ គិតត្រឹមពេលនេះ Lampard កំពុងដឹកនាំចៀមរោមពេជ្រ Derby County ក្នុងក្របខណ្ឌ Championship របស់អង់គ្លេសតាំងពីឆ្នាំ ២០១៨មក។ សរុបការប្រកួតដែលគាត់បានដឹកនាំ ៣៤ប្រកួត ឈ្នះ ១៥ ចាញ់​ ៩ និងស្មើរ ១០ប្រកួត។

2/ Gennaro Gattuso

ខ្សែបំរើឆ្នើមជួយអោយ អាសូរី អ៊ីតាលី ឈ្នះពាន World Cup កាលពីឆ្នាំ​ ២០០៦ បានបញ្ចប់អាជីពបាល់ទាត់ក្នុងប្រទេសស្វីស ជាមួយនិងក្លឹប Sion កាលពីឆ្នាំ ២០១៣។ អតីតកីឡាកររបស់បិសាចក្រហម AC Milan ដែលធ្លាប់ប្រលូកលើសមរភូមិវាលស្មៅព៍ណបៃតងជាង ៦០០ប្រកួត បានចាប់យកអាជីពជាគ្រូបង្វឹកបាល់ទាត់បន្តនៅក្នុងឆ្នាំ ២០១៣ ជាមួយនិងក្លឹប Palermo ហើយរំលងបាន៤ឆ្នាំ បុរសវ័យ៤១ឆ្នាំក៏បានចូលរួមជាមួយក្លឹបសំណប់ AC Milan ក្នុងឆ្នាំ២០១៧។ គិតមកទល់ពេលនេះដឹកនាំបាន ៦៣ប្រកួត ឈ្នះ ៣០ ចាញ់១៨ និងស្មើរ ១៥ប្រកួត។

3/ Thierry Henry

បុរសក្បាលពយជនជាតិបារំាងម្នាក់នេះ ក៏ធ្លាប់ជួយបារាំងឈ្នះពាន World Cup ម្តងកាលពីឆ្នាំ ១៩៩៨។ ក្នុងវ័យ ៣៧ឆ្នាំ Henry បានបញ្ចប់អាជឺពជាមួយក្លឹបចុងក្រោយ New York Red Bull កាលពីឆ្នាំ ២០១៤ ហើយក៏បានប្រលូកចូលការងារជាគ្រូបង្វឹកជាមួយនិងក្រុមជាច្រើន។ អតីតកីឡាកររបស់កាំភ្លើងធំ Arsenal រូបនេះទទួលបានការងារធំមួយគឺដឹកនាំ AS Monoco ក្នុងឆ្នាំ ២០១៨ ប៉ុន្តែមិនទទួលបានជោគជ័យនោះទេ ក៏ត្រូវប្រធានក្លឹបផ្អាកដំណែងវិញក្នុងពេលថ្មីៗនេះ។ អំឡុងពេលដឹកនាំ ២០ប្រកួត បុរវ័យ ៤១ឆ្នាំ ជួយអោយ Monaco ឈ្នះបានតែ ៤ប្រគួតប៉ុណ្ណោះ ស្មើរ ៥ និងចាញ់១១ដង។

4/ Roberto Carlos

សឹងតែមួយពិភពលោកនេះទៅហើយដែលស្គាល់បុរសកំពូលល្បឿនម្នាក់នេះ។ R.Carlos ធ្លាប់សាងស្នាដៃជាច្រើនជាមួយក្រុមជំរើសជាតិ និងក្រុមអាជីព ក្នុងវ័យ៤១ឆ្នាំម្ចាស់ពាន Copa America ២សម័យក៏ដោះស្បែងជើងទុកឈប់លេងបាល់ជាមួយក្លឹបចុងក្រោយក្នុងប្រទេសឥណ្ឌា Delhi Dynamos កាលពីឆ្នាំ២០១៥។ បច្ចុប្បន្នម្ចាស់ពាន World Cup ១សម័យកំពុងដឹកនាំក្រុម Delhi Dynamos នេះផ្ទាល់តែម្តង។

5/ Ryan Giggs

អតីតកីឡាករជំរើសជាតិ វែល រូបនេះលេងអោយតែបិសាចក្រហម Manchester United តែប៉ុណ្ណោះក្នុងអាជីពជាកីឡាករបាល់ទាត់។ ក្រោយចូលនិវត្តកាលពីឆ្នាំ ២០១៤ បុរសវ័យ៤៥ឆ្នាំ បានទទួលការងារដឹកនាំក្រុម ManU បណ្ណោះអាសន្នក្នុងរយៈពេលខ្លីប៉ុណ្ណោះ។ ហើយថ្មីៗនេះកាលពីថ្ងៃទី ១៥ មករា ឆ្នាំ២០១៩ Giggs ត្រូវបានតែងតាំជាគ្រូបង្វឹកក្រុមជំរើសជាតិ Wale តែម្តង។

6/ Steven Gerrard

បច្ចុប្បន្នមានវ័យ ៣៨ឆ្នាំហើយ អតីតកីឡាករ Liverpool ដែលលេងបានជាង៦០០ប្រកួត បានបញ្ចប់អាជីពបាល់ទាត់កាលពីឆ្នាំ  ២០១៦ ជាមួយនិងក្លឹប LA Galaxy។ កាលពីដើមឆ្នាំ ២០១៨ Gerrard បានទទួលភារៈកិច្ចដឹកនាំក្លឹបយក្សក្នុងប្រទេស ស្កុតឡែន Ranger។ ក្នុងចំណោម ៣៩ប្រកួតដែលដឹកនាំ មាន១៩ប្រកួតឈ្នះ ៧លើកចាញ់ និងស្មើរ ១៣លើក។

7/ Ole Gunnar Solskjær

អតីតកីឡាកររបស់ក្លឹបបិសាចក្រហម Manchester United រូបនេះបានបញ្ចប់អាជីពបាល់ទាត់ក្នុងឆ្នាំ ២០០៧ ដោយបានចាប់យកអាជីពជាគ្រូបង្វឹកក្នុងឆ្នាំ ២០១១ ជាមួយក្លឹប Molde ក្នុងប្រទេស ន័រវេស។ បន្តរហូតមកដល់ពេលនេះ Solskjær បានចូលមកដឹកនាមអតីតក្លឹបចាស់ ManU ក្នុងនាមគ្រូបណ្តោះអាសន្ន ដោយកំពុងធ្វើបានល្អមែនទែន ៨ប្រកួតឈ្នះទាំង ៨ប្រកួត។

8/ Zinedine Zidane 

វីរៈបុរសបាល់ទាត់បារាំងក៏មានស្នាដៃមិនធម្មតាដែរ នៅជាកីឡាករធ្លាប់ឈ្នះពានជាច្រើនជាមួយក្រុមអាជីព និងជំរើសជាតិ ហើយនៅពេលក្លាយជាគ្រូក៏ឈ្នះពានជាច្រើនទៀត។ ឈប់លេងបាល់កាលពីឆ្នាំ ២០០៦ ជាមួយ Real Madrid បុរសវ័យ ៤៦ឆ្នាំបានទទួលជោគជ័យក្នុងការដឹកនាំអតីតក្លឹបរបស់ខ្លួន ស្តេចស ជាបន្តទៀត។ ក្នុងចំណោម ១៤៩ប្រកួត ទទួលបានជ័យជំនះ ១០៤ប្រកួត ចាញ់ ២៩ប្រកួត និងស្មើរ ១៦លើក ជួយអោយក្លឹបយកបានពាន La Liga 1, UEFA Champions League 3ដងជាប់គ្នា, FIFA Club World Cup 2, និង UEFA Super Cup 2 សម័យ៕