ការជ្រើសរើសបេក្ខភាពកីឡាករល្អប្រចាំទ្វីបអឺរ៉ុបបានប្រកាសជាផ្លូវការហើយ ដើម្បីអោយប្រិយមិត្តទាំងឡាយបានស្គាល់ពួកគេ។ កីឡាករ Locas Modric កីឡាករ Mohamad Salah និង កីឡាករ C.Ronaldo  គឺជាបេក្ខភាពឈានមុខ3នាក់ក្នុងការប្រជែងយកពានកិត្តិយស កីឡាករឆ្នើមប្រចាំទ្វីបអឺរ៉ុប។

វត្តមានរបស់កីឡាករទាំង3ក្នុងពេលនេះ បានមកពីការបោះឆ្នោតពីសំណាក់គ្រូបង្វឹកចំនួន 80នាក់ដែលមានឈ្មោះដឹកនាំក្នុងព្រឹត្តិការណ៏ UCL និង UEL រដូវកាលមុន និងរួមជាមួយអ្នកកាសែតជួរមុខ55នាក់ផ្សេងទៀតដែលស្ថិតក្រោមដំបូល UEFA។

Ronaldo  និង Modric ជួយអោយស្តេចឈ្នះពាន UCL 3រដូវកាលជាប់គ្នា ដែលបច្ចុប្បន្នខ្សែប្រយុទ្ធជនជាតិ Portugal ផ្លាស់ទៅក្លឹបថ្មី  Juventus ជាមួយកំណត់ត្រា Top-Scorer 6រដូវកាលជាប់គ្នានៅ UCL។

តារាបាល់ទាត់ Croatia ក៏ទើបតែទទួលបានពានកិត្តិយស Golden Ball ក្នុងព្រឹត្តិការណ៏ World Cup 2018 ផងដែរ ដែលរូបគេបានជួយក្រុមអណ្តាតភ្លើងឡើងដល់វគ្គផ្តាច់ព្រាត់ និងទទួលបានចំណាត់ថ្នាក់លេខ2។

ចំណែកតារាទើបរះ Mohamad Salah ក៏បានជួយហង្សក្រហមក្លាយជាជើងឯករង UCL រដូវកាលមុននិងរកគ្រាប់បាល់បញ្ចូលទីគ្រប់កម្មវិធីទាំងអស់ក្នុងរដូវកាលដំបូងជាមួយ Liverpool ចំនួន44គ្រាប់ផងដែរ។

ដោយឡែកបេក្ខភាពផ្សេងទៀតដូចជា A.Greizman ដែលជួយបារាំងឈ្នះពាន World Cup 2018 និង At.Madrid ឈ្នះពាន UEL រដូវកាលមុនកំពុងស្ថិតក្នុងចំណាត់លេខ4 រីលេខរៀងទី5គឺ តារាបាល់ទាត់របស់ Barcelona, Leo Messi ដែលធ្លាប់ឈ្នះពានកិត្តិយសនេះ2ដងរួចមកហើយ។

ក្នុងនោះដែរកីឡាករលំដាប់កំពូលមួយចំនួនដូចជា Mbappe, De Bruyne, R.Varane, E.Hazard និង S.Ramos ក៏មានឈ្មោះក្នុងបញ្ជីកីឡាករ10នាក់ដែរ។

គួរ​បញ្ជាក់ថា លទ្ធផលនៃពានរង្វាន់កិត្តិយស UEFA Player of the Year នេះនិងប្រកាសជាផ្លូវការនៅថ្ងៃទី30 ខែសីហា ក្នុងកម្មវិធីចាប់ឆ្នោត UEFA Champions League វគ្គចែកពូលសំរាប់រដូវកាលថ្មី 2018/2019៕