បន្ទាប់ពីមានការ​ចុះផ្សាយ​ពីបណ្តាសារព័ត៌មានអេស្ប៉ាញជាច្រើន ថាក្លឹបយក្សនៅ Serie A របស់​អ៊ីតាលី​ Juventus កំពុងតែទាក់ទងលោក Zinedine Zidane ទៅធ្វើជាទីប្រឹក្សា, ក្លឹប​ដែលមាន​រហ័សនាមថា ស្ត្រីចំណាស់ “the Old Lady”នេះ បាន​ចេញ​មុខ​មក​បដិសេធនៅថ្ងៃម្សិលមិញថា គេមានអ្នក​ឲ្យ​ប្រឹក្សា​រួចហើយ ហើយក៏មិនចង់បាន Zidane មកដែរ។

គេហទំព័រ Calciomercato.com បានចុះផ្សាយ​ថា ក្លឹប​ Jventus បាន​បដិសេធពីសេចក្តីរាយការណ៍នានា ដោយ​លើកឡើងថា គេគ្មានបំណង​ចង់ចុះហត្ថលេខានាំលោក Zidane ឬ កូនប្រុស​របស់គាត់ Luca មក​ចូលរួមជាមួយក្រុមនោះទេ ព្រោះ​ខណៈពេលនេះ ក្លឹបមាន លោក Pavel Nedved ជាទីប្រឹក្សារួចហើយ។

គួរជម្រាបជូនថា បន្ទាប់ពីការបញ្ជាក់ជាផ្លូវការពីវត្តមានកីឡាករ Cristiano Ronaldo នៅក្លឹប Juventus សារព័ត៌មានអេស្ប៉ាញជាច្រើន បានចុះផ្សាយ​ថា ក្លឹប​មួយនេះ កំពុង​មានទំនាក់ទំនងនាំយកលោក Zidane អតីតអ្នកចាត់ការទូទៅក្លឹបយក្ស Real Madrid ទៅចូលរួម​ជាទីប្រឹក្សា។ ហើយបើតាមសារព័ត៌មានទាំងនោះ ហេតុផលនៃការចង់បាន លោក Zidane របស់ Juventus គឺដោយសារតែគាត់ធ្លាប់​ជាអតីតកីឡាកររបស់ក្លឹបនេះ ពីឆ្នាំ ១៩៩៦ ដល់ ២០០១ មុនពេលផ្ទេរទៅកាន់ក្លឹប Real Madrid។ មិន​ត្រឹមតែប៉ុណ្ណោះ សារព័ត៌មានទាំងនោះក៏បានផ្សាយថា ក្លឹបយក្ស​នៅអ៊ីតាលីនេះ ចង់បានកូនប្រុសលោក Zidane ឈ្មោះ Luca ទៅធ្វើជាអ្នក​ចាំទីរបស់ខ្លួនទៀត៕