សារព័ត៌មានចិន បាននាំគ្នាចុះផ្សាយ​ព្រោងព្រាតនៅក្នុងសប្តាហ៍នេះថា អ្នក​គាំទ្រ​បាល់ទាត់​ចិនជាង ៣,៥០០នាក់ មិនត្រូវ​បានអនុញ្ញាតឲ្យ​ចូលទស្សនា ក្នុង​កីឡដ្ឋាន ដែល​មាន​រៀបចំព្រឹត្តិការណ៍ប្រកួតបាល់ទាត់ពិភពលោក World Cup ក្នុង​ប្រទេសរុស្ស៊ីនោះទេ។ មូលហេតុនៃការបដិសេធនេះ គឺដោយសារតែសំបុត្រចូល​ទស្សនា របស់អ្នក​គាំទ្រ​ជនជាតិចិនទាំងនោះ ជាសំបុត្រក្លែងក្លាយ។ ដំណឹងនេះ បាន​បែកធ្លាយ បន្ទាប់ពីការប្រកួត​រវាងអាស្សង់ទីន និង​អ៊ីស្លង់ ក្នុងទីក្រុងម៉ូស្គូ កាលពីពេលកន្លងទៅ។

អ្នក​គាំទ្រ​បាល់ទាត់ជនជាតិ​ចិនទាំងនោះ បានទិញ​សំបុត្រតាមអនឡាញ ពីភ្នាក់ងាររុស្ស៊ី​ប្រចាំប្រទេសចិន។ ទោះបីជាក្រុមបាល់ទាត់ជម្រើសជាតិចិន មិនជាប់បានលេង World Cup ក្នុង​ឆ្នាំ ២០១៨នេះមែន តែអ្នក​គាំទ្រ​បាល់ទាត់ទាំងនោះ ចង់ទៅទស្សនាកីឡាករដែល​ពួកគេ​ស្រលាញ់គាំទ្រ។ អ្នក​គាំទ្រ​ ដែល​បាន​ចំណាយប្រាក់​យ៉ាងតិចក៏ប្រមាណ ៥០០ដុល្លារ ដើម្បីទិញ​សំបុត្រចូលទស្សនា មានការ​សោកស្តាយ​ស្ទើរយំបោកខ្លួន។​​​ យ៉ាងណាក៏ដោយស្ថានទូតរុស្ស៊ី ប្រចាំប្រទេសចិន កំពុងតែបើកការស៊ើបអង្កេតជុំវិញករណីនេះ។

គួរជម្រាបជូនថា ទោះបីជាក្រុមបាល់ទាត់ជម្រើសជាតិចិន មិនបានជាប់​លេង World Cup  នៅ​រុស្ស៊ីមែន តែមានអ្នក​គាំទ្រ​បាល់ទាត់ជនជាតិ​ចិន ប្រមាណជាង ៤ម៉ឺននាក់ បានទិញ​សំបុត្រ​តាមអនឡាញ ដើម្បីទៅទស្សនាការប្រកួតនោះ (យោងតាម​ទិន្នន័យពី FIFA)។ តាម FIFA ជនជាតិចិន ជាប់ចំណាត់ថ្នាក់លេខ ៩ ក្នុ​ងចំណោ​ម​ជនជាតិ​ផ្សេងទៀត ដែល​ ទិញ​សំបុត្រទៅទស្សនាការប្រកួត World Cup ខណៈដែល​សហរដ្ឋអាមេរិក ដែល​មិន​បាន​ជាប់​លេងនៅ World Cup ដែរនោះ ស្ថិតនៅ​ចំណាត់ថ្នាក់លេខ២ ដោយ​មានប្រជាជន​អាមេរិកជិត ៩ម៉ឺននាក់ បានទិញ​សំបុត្រតាម FIFA.com៕