គ្រូបង្វឹក​ក្រុម​ជម្រើសជាតិប្រេស៊ីល លោក Tite បាន​និយាយ​ថា Neymar មិនទាន់​ជាស្រួល​បួល ១០០ភាគរយទេ ប៉ុន្តែគេអាច​លេង​ក្នុងតួនាទីផ្សេងបានខ្លះៗ។ ការលើកឡើង​របស់​គ្រូបង្វឹក​ប្រេស៊ីល​នេះ គឺ​នៅមុន​ពេល​ដែល​ក្រុម​សាំបាប្រេស៊ីល ត្រូវប្រកួត​លើកដំបូង​ក្នុង​វគ្គ​ជម្រុះពូល E របស់ខ្លួន ជាមួយ​ក្រុម​ស្វីស នៅយប់​ថ្ងៃអាទិត្យនេះ។

គួររម្លឹកជូនថា កីឡាករតំលៃខ្លួន​ថ្លៃបំផុត​លើលោក​មួយនេះ បាន​រងរបួស​បាក់ឆ្អឹងជើង តាំងពីខែកុម្ភៈ ហើយគេបាន​ចូលរួម​លេង​សមជើង​ជាមួយ​ក្រុម​ជម្រើសជាតិ​ប្រេស៊ីល បាន​តែ ២ប្រកួត​ប៉ុណ្ណោះមុន​ពេល World Cup នៅរុស្ស៊ី​ចាប់ផ្តើម។ ក្នុង​ការប្រកួត​សមជើង ទាំង ២ប្រកួត ខ្សែប្រយុទ្ធ​របស់ Paris Saint Germain រក​គ្រាប់បាល់ បានដល់ទៅ ៥គ្រាប់។

លោក Tite និយាយថា៖ «គាត់ (Neymar) មិនទាន់ជា ១០០ភាគរយទេពេលនេះ ប៉ុន្តែគាត់​មាន​គុណសម្បត្តិ​នៃរាងកាយ​ល្អ ហើយ​ល្បឿន​របស់​គាត់នៅ​តែលឿន។ ខ្ញុំ​សង្ឃឹមថា គាត់នឹង​ជា​សះស្បើយ​មែនទែន នៅថ្ងៃអាទិត្យនេះ។ ដូច្នេះដើម្បីប្រការហេតុការណ៍អាក្រក់ណាមួយ យើង​ទុកគាត់ឲ្យលេងបម្រុង»។

សូម​បញ្ជាក់ថា ក្នុងការប្រកួត​បាល់ទាត់ World Cup 2018 ដែលរុស្ស៊ី ធ្វើជាម្ចាស់​ផ្ទះ ប្រេស៊ីល​ ស្ថិតនៅក្នុងពូល E ដែល​មាន​កូស្តារីកា ស៊ែបី និង​ស្វីស។ អ្វីដែល​គ្រប់គ្នា​ចង់​ឃើញពីប្រេស៊ីលនៅពេលនេះ គឺការស្តារ​មុខ​មាត់ឡើង​វិញ បន្ទាប់ពី​បានប្រកួត​ចាញ់ក្រុម​ឥន្ទ្រី​ដែក​អាល្លឺម៉ង់ក្នុងទឹកដីខ្លួនឯង កាលពី World Cup 2014 ក្នុងលទ្ធផល 1-7៕