ប្រធានក្រុម​បាល់ទាត់ជម្រើសជាតិអង់គ្លេស Harry Kane សម្រេច​ចុះកុងត្រាបន្តនៅលេងជាមួយក្រុម​ Tottenham Hotspur ៦ឆ្នាំ ក្នុង​អត្រា​​ប្រាក់ឈ្មួល គុណនឹង ២ ដែល​មាន​តំលៃប្រមាណជា ៩០លានផោន ឬ ប្រមាណ ១២០លានដុល្លារ។ ការ​ប្រកាសបន្តយ៉ាងច្បាស់លាស់នេះ គឺបន្ទាប់​ពី​មាន​ដំណឹង​ល្ហិចល្ហៀង កាលពីពេលកន្លងមក​ថា ម្ចាស់​ក្លឹប​អធិរាជស Real Madrid ចង់​បាន Harry Kane ទៅលេងជាមួយខ្លួន។

ក្នុងពិធីចុះហត្ថលេខាបន្តជាមួយ Harry Kane កាលពីថ្ងៃសុក្រ​ អ្នក​ចាត់ការទូទៅ លោក Mauricio Pochettino និង​ប្រធានក្លឹប លោក Daniel Levy បាន​ឲ្យ​ដឹងថា ពួកលោក​ក៏គ្រោ​ង​នឹង​រក្សាទុក​ខ្សែបម្រើ​ Dele Alli និង Christian Eriksen ឲ្យ​បាន​គង់វង្សផងដែរ។

Harry Kane បាន​និយាយ​នាឱកាសនោះថា ៖ «ខ្ញុំពិតជារំភើបចិត្តណាស់ ថ្ងៃនេះជាថ្ងៃដ៏មានមោទនភាព​សម្រាប់​ខ្ញុំ។ ខ្ញុំ​កំពុង​តែសម្លឹងមើល​ទៅថ្ងៃអនាគតជាមួយក្លឹប ជាមួយ​នឹងកីឡដ្ឋានថ្មី ជាមួយ​ថ្នាក់ដឹក​នាំ និង​គ្រប់គ្នាក្នុងក្លឹប។ អ្វីដែល​ពិសេស គឺរឿងនេះ កើតឡើង​នៅមុនការ​ប្រកួត World Cup ដែល​ធ្វើឲ្យ​ខ្ញុំកាន់តែមានទឹកចិត្តបន្ថែមទៀត»។

គួររម្លឹកជូនថា កាលពីឆ្នាំ ២០១៦ Kane បាន​ព្រមព្រៀង​ជាមួយ Spurs ក្នុងតំលៃខ្លួន 110,000ផោន ក្នុងមួយ​សប្តាហ៍ ប៉ុន្តែបន្ទាប់ពី Spurs គ្រោង​ប្តូរ​កីឡដ្ឋាន​ថ្មី លោក Levy បាន​សម្រេ​ផ្តល់​តំលៃខ្លួន​យ៉ាងខ្ពស់ ​ដល់​ Kane ដែល​អាចបញ្ជូល​ទីបាន ៤១គ្រាប់ កាលពីរដូវកាលមុន។ តាម​ការ​ទម្លាយ​តំលៃ​ខ្លួន​របស់ Kane ដោយ MailOnline បាន​បង្ហាញ​​ថា​​ Kane អាចមាន​ប្រាក់ឈ្មួលថ្មី 200,000ផោន ក្នុងមួយ​សប្តាហ៍ ហើយ​បើ​គិត​បូករួម​ទាំង​ថ្លៃ រង្វាន់​លើកទឹក​ពេល​គេ​ស៊ុតបញ្ជូល​ទីផ្សេងៗ គឺគេ​អាចរក​បាន​ដល់​ទៅជិត 300,000ផោន ក្នុងមួយសប្តាហ៍។

ម្ចាស់ក្លឹប Tottenham សន្យាថា នឹងឲ្យ​ប្រាក់ ១០០លានផោន ដើម្បីជួយ Pochettino រៀបចំ​ក្រុម​ខ្លាំងមួយ សម្រាប់​ប្រកួត​ប្រជែង នៅរដូវកាលក្រោយ។ ក្រៅពីនោះ គេ​ក៏នឹង​មាន​កញ្ចប់​ទឹកប្រាក់បន្ថែម ដែល​បាន​ពីការ​លក់ ​ Toby Alderweireld  និង​ Danny Rose។ មន្ត្រីផ្លូវការ​របស់ Spurs កំពុង​ធ្វើការ​ដើម្បីនាំយក កីឡាករ Anthony Martial ពី Manchester United ហើយ​គេក៏កំពុង​ចាប់អារម្មណ៍ខ្សែការពារក្រុម Ajax កីឡាករ Matthijs deLigt ផងដែរ។ ជាមួយគ្នា Spurs ត្រូវបាន​បង្ហើបឲ្យ​ដឹងថា កំពុង​ទាក់ទងក្រុម Aston Villa ក្នុងតំលៃ ៤០លានផោន ដើម្បីនាំយក​ខ្សែបម្រើ Jack Grealish មក​រួម​ក្រុម៕